PAMJE: Helikopteri rrëzohet, humb jetën milioner rus
Një video që qarkullon në internet tregon momentin kur një helikopter rrëzohet në Perm, në Malet Urale të Rusisë, pasi u ngatërrua në linjat e energjisë elektrike.
Videoja, e publikuar nga rrjeti televiziv rus RT, tregon helikopterin duke fluturuar në një lartësi relativisht të ulët. Ai ngatërrohet në tela dhe më pas rrëzohet në tokë.
Raportohet se dy pasagjerët e helikopterit kanë humbur jetën. Njëri prej tyre ishte milioneri rus Ilyas Gimandutdinov, themelues i kompanisë së transportit Tattranskom, me seli në Perm. Tjetri ishte Elmir Koniakov, drejtues i së njëjtës kompani.
Mediat ruse raportuan se helikopteri ishte një “Robinson R44 Raven”, në pronësi të kompanisë dhe që po kryente një fluturim të paautorizuar.
Autoritetet lokale kanë nisur një hetim për të përcaktuar shkakun e rrëzimit të helikopterit. Indikacionet fillestare sugjerojnë se ai mund të jetë ngatërruar në linjat e energjisë, megjithëse EMERCOM nuk e ka konfirmuar publikisht këtë detaj.