Aktivisti britanik Imran Ahmed padit administratën Trump pasi i ndalohet hyrja në SHBA
Imran Ahmed, një shtetas britanik dhe figurë e njohur në mbështetjen e rregulloreve më strikte për sektorin e teknologjisë, ka ngritur një padi kundër administratës së presidentit Donald Trump. Ai, së bashku me katër personalitete të tjera evropiane, i është ndaluar hyrja në Shtetet e Bashkuara.
Sipas padisë së paraqitur në një gjykatë në Nju Jork, Ahmed shprehet se rrezikon të përballet me “arrestim antikushtetues, paraburgim ndëshkues dhe deportim” nga vendi i tij i origjinës.
Dokumenti ligjor thekson se “qeveria federale ka bërë të qartë se Ahmed është subjekt i sanksioneve” për shkak të punës së organizatës joqeveritare që ai ka themeluar dhe drejton, Qendrës për Kundërshtimin e Urrejtjes Dixhitale (Center for Countering Digital Hate).
Kjo organizatë monitoron politikat e platformave kryesore të mediave sociale dhe ka kritikuar vazhdimisht praktikat e platformës X, e njohur më parë si Twitter, e cila është në pronësi të miliarderit Elon Musk.
Të martën, Shtetet e Bashkuara vendosën sanksione jo vetëm ndaj Imran Ahmed, por edhe ndaj tre përfaqësuesve të tjerë të organizatave që luftojnë dezinformimin dhe gjuhën e urrejtjes në internet:
- Clare Melford, drejtuese e Indeksit Global të Dezinformimit me seli në Mbretërinë e Bashkuar.
- Anna-Lena von Hodenberg dhe Josephine Ballon nga organizata gjermane HateAid.
Në listën e të sanksionuarve përfshihet gjithashtu edhe ish-Komisioneri Evropian për Çështjet Dixhitale, francezi Thierry Breton.
Autoritetet amerikane nuk kanë bërë ende komente publike lidhur me padinë apo arsyet ligjore të sanksioneve.