“`html
Raporti i Financave: Industria në krizë tkurr të ardhurat nga tatimi mbi fitimin
Të ardhurat e mbledhura nga Tatimi mbi Fitimin këtë vit janë më të ulëta se parashikimet e Kuadrit Makroekonomik 2026-2028, kryesisht për shkak të krizës në sektorin e industrisë.
Sipas analizës “Devijancat e Parashikimeve” të Ministrisë së Financave, të ardhurat nga ky tatim kanë shënuar një devijim negativ prej 4 miliardë lekësh (mbi 40 milionë euro), ose rreth 0.1% të Prodhimit të Brendshëm Bruto (PBB), krahasuar me Kuadrin Makroekonomik.
Ky nën-realizim lidhet kryesisht me performancën e dobët të industrisë dhe veçanërisht me tkurrjen e fitimeve në sektorin e prodhimit, i cili vetëm ka sjellë në buxhet 3 miliardë lekë më pak se parashikimi.
Dokumenti i Ministrisë së Financave hedh dritë mbi ecurinë negative të industrisë, duke sqaruar se tkurrja ka ardhur si pasojë e një rënieje të fortë të pagesave në shtyllat kryesore të industrisë: energjia dhe fabrikat përpunuese.
Tkurrja e xhiros dhe fitimeve në sektorin e energjisë elektrike, në rrjetin e transmetimit, si dhe në industrinë fason ka krijuar një efekt zinxhir. Sipas Ministrisë së Financave, kjo situatë është shtrirë në mënyrë të përhapur në plot 28 nënsektorë industrialë, duke dëshmuar për një ngadalësim të gjerë të aktivitetit prodhues në vend.
Disa nga faktorët kryesorë që kanë kontribuar në këtë situatë janë:
- Nënçmimi i vazhdueshëm i monedhës vendase ndaj euros ka zhvlerësuar të ardhurat e industrisë eksportuese, duke ulur ndjeshëm marzhet e tyre të fitimit.
- Rritja e kostove të brendshme të fuqisë punëtore, e diktuar nga mungesa e krahut të punës dhe rritja e pagave minimale e mesatare, ka shtuar presionin financiar mbi kompanitë prodhuese.
- Rënia e kërkesës në tregjet ndërkombëtare për disa mallra bazë, si dhe stabilizimi i çmimeve të energjisë krahasuar me vitet e krizës, uli fitimin e jashtëzakonshëm.
- Edhe pse inflacioni i përgjithshëm ka rënë, kostot e lëndëve të para industriale, makinerive dhe transportit mbeten të larta krahasuar me periudhën para krizës. Ndërmarrjet prodhuese shpesh e kanë të pamundur t’ia kalojnë këto kosto shtesë klientit final, duke u detyruar t’i absorbojnë vetë, gjë që vjen me koston e tkurrjes së fitimit të tyre.
Raporti “Devijancat e Parashikimeve” nënvizon se, megjithëse sektorët e shërbimeve, tregtisë dhe ndërtimit patën një ecuri pozitive dhe shënuan rritje gjatë kësaj periudhe, ky vrull nuk ka qenë i mjaftueshëm për të kompensuar humbjet e mëdha dhe rënien e përgjithshme të regjistruar nga sektori i industrisë.
“`