Irani vijon sulmet, shënjestron bazat amerikane në Emirate, Irak dhe Kuvajt
Garda Revolucionare e Iranit (IRGC) njoftoi të enjten se kishte shënjestruar Izraelin, si dhe bazat amerikane në Emiratet e Bashkuara Arabe, Irak dhe Kuvajt.
“Vendi i grumbullimit të forcave amerikane në Rrugën Sheikh Zayed (Dubai) dhe vendndodhja e forcave amerikane në Aeroportin Ahmad Al-Jaber (Kuvajt) u vunë në shënjestër”, theksoi faqja e internetit Sepah News, e cila drejtohet nga IRGC.
“Rezidenca e marinsave amerikanë në bazën Al-Dhafra (Emiratet e Bashkuara Arabe) dhe bazat e lëvizshme amerikane në Irak, së bashku me vendin e mbledhjes së ekzekutorëve sionistë në Tel Aviv janë goditur”, u shtua në njoftim.
Megjithëse Teherani pretendon se po synon vetëm bazat ushtarake amerikane në vendet e rajonit, sulmet e tij të vazhdueshme me raketa dhe dronë kanë shkaktuar dëme në infrastrukturë, veçanërisht në sektorin e energjisë, dhe në objektiva civile si aeroportet, ndërtesat e banimit, shkollat dhe hotelet, duke rezultuar gjithashtu në viktima civile.