Izraeli ka refuzuar lirimin e Marwan Barghoutit, një nga figurat më të njohura dhe potencialisht unifikuese palestineze. Ai nuk është përfshirë në listën e të burgosurve që Izraeli synon të lirojë në këmbim të pengjeve.
Barghouti, 66 vjeç, është një udhëheqës i Fatahut, rivali kryesor politik i Hamasit. Ai konsiderohet gjerësisht si një pasardhës i mundshëm i presidentit Mahmoud Abbas, i cili drejton Autoritetin Palestinez në Bregun Perëndimor.
Një zyrtar i lartë i Hamasit, Mousa Abu Marzouk, ka deklaruar për Al Jazeera se lëvizja këmbëngul për lirimin e Barghoutit, ndërsa Izraeli e cilëson atë terrorist. Disa ekspertë sugjerojnë se frika e Izraelit ndaj Barghoutit lidhet me mbështetjen e tij për zgjidhjen me dy shtete, pavarësisht se ka përkrahur rezistencën e armatosur ndaj pushtimit, duke e bërë atë një figurë mobilizuese për palestinezët.
Kush është Marwan Barghouti?
I lindur në Bregun Perëndimor, Barghouti u shqua si udhëheqës i protestave studentore kundër pushtimit izraelit gjatë studimeve në Universitetin Bir Zeit. Ai më vonë u bë organizator i Intifadës së parë palestineze, e cila filloi në dhjetor 1987. Pas dëbimit në Jordani nga Izraeli, ai u kthye në Bregun Perëndimor në vitet ’90 si pjesë e marrëveshjeve të përkohshme të paqes.
Barghouti u bë kreu i Fatahut në Bregun Perëndimor. Gjatë Intifadës së Dytë, Izraeli e akuzoi atë si udhëheqës të Brigadave të Dëshmorëve të Al-Aqsa, një grup i armatosur i lidhur me Fatahun. Ai nuk ka komentuar lidhjet e tij me këtë grup.
Në një editorial të vitit 2002, Barghouti shkroi: “Nuk jam terrorist, por as pacifist.” Pak kohë më pas, ai u arrestua nga Izraeli dhe zgjodhi të mos mbrohej në gjyq, duke mos e njohur autoritetin e gjykatës.
Aktualisht, ai po vuan disa dënime të përjetshme, pasi u dënua në vitin 2004 për sulme që rezultuan me vdekjen e pesë personave në Izrael. Ndërkohë që ndodhet në burg, ai ka drejtuar një grevë urie 40-ditore me pjesëmarrjen e mbi 1,500 të burgosurve, duke kërkuar kushte më të mira.