Izraeli zgjeron operacionet në Liban, 31 viktima përfshirë fëmijë
Një valë intensive sulmesh ajrore izraelite në jug dhe lindje të Libanit ka shkaktuar vdekjen e dhjetëra personave. Kryeministri izraelit, Benjamin Netanyahu, ka paralajmëruar për një përshkallëzim të mëtejshëm të operacioneve kundër Hezbollahut.
Sipas Ministrisë së Shëndetësisë së Libanit, të paktën 31 persona kanë humbur jetën në bombardimet e fundit, mes tyre edhe fëmijë, ndërsa dhjetëra të tjerë janë plagosur.
Ushtria izraelite ka njoftuar se gjatë natës ka goditur më shumë se 100 objektiva të Hezbollahut, duke përfshirë depo armësh, qendra komande, poste vëzhgimi dhe infrastrukturë ushtarake në Libanin jugor. Kjo është një nga netët më intensive të bombardimeve që nga hyrja në fuqi e armëpushimit të ndërmjetësuar nga SHBA në mes të prillit.
Tensionet u shtuan më tej pasi ushtria izraelite njoftoi se një raketë e lëshuar nga Libani aktivizoi sirenat në veri të Izraelit. Autoritetet izraelite deklaruan se raketa ra në një zonë të hapur dhe nuk shkaktoi viktima.
Duke folur në mbledhjen e kabinetit të sigurisë, Netanyahu u shpreh se Izraeli po “thellon operacionin e tij në Liban”. Ai shtoi se “Forcat Mbrojtëse të Izraelit po operojnë me forca të mëdha në terren dhe po pushtojnë territor sovran”, me qëllim forcimin e “zonës së sigurisë” për mbrojtjen e komuniteteve në veri të Izraelit nga sulmet e Hezbollahut.
Sulmet ajrore kanë goditur zona të ndryshme, përfshirë fshatin Masghara në Luginën Bekaa dhe Burj al-Shamali në jug të Libanit. Mediat lokale raportuan gjithashtu bombardime pranë Kështjellës Beaufort, një fortesë mesjetare e njohur nga UNESCO si një nga kështjellat më të ruajtura në rajon.
Deklaratat e Netanyahut kanë shkaktuar panik në periferitë jugore të Bejrutit, bastion tradicional i Hezbollahut, ku mijëra banorë u larguan me automjete nga frika e bombardimeve të reja.
Mes viktimave ishte edhe familja e 7-vjeçarit Mohammed, i cili mbijetoi pasi raketa goditi shtëpinë e tij gjatë natës. “Kur u zgjova, ndjeva sikur nuk mund të lëvizja dhe kishte vetëm errësirë përreth meje,” tha ai nga spitali, duke treguar se babai dhe dy motrat e tij humbën jetën në sulm.