Japonia arrin një rekord historik: mbi 100 mijë qytetarë mbi 100 vjeç
Japonia ka kaluar për herë të parë pragun e 100 mijë personave të moshës 100 vjeç e lart. Sipas të dhënave të fundit të Ministrisë së Shëndetësisë, në vend aktualisht jetojnë 107,677 persona mbi 100 vjeç, duke shënuar shifrën më të lartë të regjistruar ndonjëherë. Mbi 88% e tyre janë gra.
Personi më i moshuar në Japoni është Kishimoto Fuyo, 114 vjeçe nga Kioto, ndërsa burri më i moshuar është Kato Hikaru, 112 vjeç, nga prefektura Kumamoto.
Ministri i Shëndetësisë, Kenichiro Ueno, shprehu kënaqësinë e tij për jetëgjatësinë e lartë dhe cilësinë e jetës së qytetarëve të moshuar, duke ia atribuuar këtë përparimit në mjekësi dhe teknologji.
Jetëgjatësia e lartë e popullsisë japoneze lidhet nga ekspertët me disa faktorë kryesorë:
- Ushqyerja: Dieta tradicionale japoneze, e pasur me peshk, perime dhe oriz.
- Stili i jetesës aktiv: Të moshuarit angazhohen rregullisht në ecje, përdorin transportin publik, lëvizin me biçikletë dhe kryejnë ushtrime fizike.
Megjithatë, ky zhvillim pozitiv vjen përkrah një sfide të madhe: plakja e shpejtë e popullsisë. Personat mbi 65 vjeç përbëjnë aktualisht rreth 30% të popullsisë dhe pritet të arrijnë pothuajse 40% deri në vitin 2070. Në të njëjtën kohë, lindshmëria ka rënë në nivele rekord, me mesatarisht 1.14 fëmijë për grua vitin e kaluar, shifër dukshëm nën nivelin 2.1, të nevojshëm për zëvendësimin e popullsisë.
Parashikimet tregojnë se popullsia e Japonisë mund të bjerë në 87 milionë banorë deri në vitin 2070, një rënie prej rreth 30% krahasuar me kulmin prej 128 milionësh të regjistruar në vitin 2008. Qeveria ka cilësuar këtë prirje si një “krizë ekzistenciale”, ndërsa përpjekjet për nxitjen e lindjeve përmes programeve dhe subvencioneve nuk kanë rezultuar ende në rritje të dukshme të numrit të lindjeve.
Vitet e fundit kanë shënuar një rritje të jashtëzakonshme të numrit të personave mbi 100 vjeç. Në vitin 1963, kur filluan regjistrimet zyrtare, në Japoni jetonin vetëm 153 persona mbi 100 vjeç. Shifra arriti në 1 mijë në vitin 1981 dhe në 10 mijë në vitin 1998.