Kazakistani prezanton në Tiranë një kapitull të ri bashkëpunimi me Shqipërinë, nga reforma kushtetuese te linja ajrore direkte
Kazakistani dhe Shqipëria po shqyrtojnë mundësinë e vendosjes së një linje ajrore direkte mes dy vendeve, e cila pritet të nisë vitin e ardhshëm. Ky projekt synon të lehtësojë lëvizjen e qytetarëve dhe të forcojë lidhjet në turizëm, tregti dhe bashkëpunim ekonomik, ndërkohë që pala shqiptare po e shqyrton aktualisht këtë mundësi.
Çështja e lidhjes ajrore direkte u bë pjesë e diskutimeve gjatë një takimi informues të zhvilluar në Ambasadën e Kazakistanit në Tiranë. Gjatë takimit u prezantuan gjithashtu reformat e reja kushtetuese dhe zgjedhjet e 23 gushtit 2026 për parlamentin e ri.
Zgjedhjet nuk janë vetëm një garë për përbërjen e një parlamenti të ri. Ato përfaqësojnë testin e parë praktik të një arkitekture të re kushtetuese që ndryshon mënyrën e organizimit të pushtetit ligjvënës dhe marrëdhëniet ndërmjet institucioneve kryesore të shtetit.
Kushtetuta e re u miratua me referendum më 15 mars dhe hyri në fuqi më 1 korrik 2026. Me hyrjen e saj në fuqi përfundoi mandati i parlamentit të mëparshëm me dy dhoma. Në vend të Senatit dhe Mazhilisit krijohet Kurultai, një organ ligjvënës njëdhomësh me 145 deputetë dhe mandat pesëvjeçar.
Sistemi zgjedhor është proporcional, me lista partiake dhe një zonë të vetme kombëtare. Shtatë parti kanë paraqitur 545 kandidatë për 145 vende. Pragu prej pesë për qind synon të ruajë një ekuilibër ndërmjet përfaqësimit politik dhe funksionalitetit parlamentar.
Kurultai do të ketë kompetenca për:
- Miratimin e buxhetit dhe mbikëqyrjen e zbatimit të tij.
- Pëlqimin për emërime të rëndësishme kushtetuese.
- Dëgjimin e raporteve të Qeverisë dhe Dhomës së Lartë të Auditimit.
- Mundësinë për të votuar mosbesimin ndaj Qeverisë.
Në takim, Këshilltari Baurzhan Alzhanov e cilësoi procesin si fillimin e një faze të re institucionale, ndërsa Dr. Redion Luli e analizoi reformën nga këndvështrimi i së drejtës ndërkombëtare.
Reformat dhe zhvillimi i lidhjeve të transportit u diskutuan në kuadër të marrëdhënieve në rritje mes Kazakistanit dhe Shqipërisë. Një linjë ajrore direkte do të përbënte një hap konkret për afrimin e dy vendeve dhe do t’u jepte një dimension të ri marrëdhënieve në turizëm, biznes dhe shkëmbime njerëzore.