KLSH: Mbi 11 mijë raste pagesash të pensioneve pas vdekjes
Kontrolli i Lartë i Shtetit (KLSH) ka publikuar rezultatet e një auditimi të hollësishëm mbi Institutin e Sigurimeve Shoqërore (ISSH), duke nxjerrë në pah një seri shkeljesh thelbësore në procesin e pagesave për përfituesit.
Sipas raportit të Sektorit të Kontrollit të Pagesave, janë evidentuar parregullsi të ndryshme, duke përfshirë pagesa të dyfishuara, pagesa të kryera pas vdekjes së përfituesve, shuma më të mëdha se sa duhet, dhe pagesa jashtë afateve të përcaktuara.
Vetëm gjatë vitit 2024, në të gjitha rajonet e vendit janë konstatuar 821 raste të tilla, duke i shkaktuar buxhetit një dëm financiar prej 36,919,340 lekësh. Deri në fund të vitit 2024, janë rikuperuar 29,059,735 lekë. Megjithatë, mbeten ende 7,859,605 lekë për t’u arkëtuar, të cilat kërkojnë ndjekje të mëtejshme administrative dhe ligjore.
Shkelje të rënda edhe në Shkodër
Auditimi ka zbuluar parregullsi të tjera të rëndësishme në rajonin e Shkodrës. Janë identifikuar 46 raste pagesash të kryera me mandate pa firmën e pensionistit, një shkelje që ngre dyshime mbi kontrollin dhe verifikimin e dokumentacionit. Nga këto, 33 raste janë zbuluar nëpërmjet sistemit TIMS, me një vlerë totale prej 13,299,538 lekësh, ndërsa 13 raste të tjera përbëjnë pagesa të parregullta me vlerë 418,447 lekë.
Mbi 11 mijë pagesa pas vdekjes së përfituesve
Një tjetër gjetje shqetësuese lidhet me pagesat e kryera pas ndarjes nga jeta të përfituesve. Vetëm gjatë periudhës janar–dhjetor 2024, janë regjistruar 11,030 raste, duke shkaktuar një dëm prej 114,885,368 lekësh. Kjo shifër përfshin të gjitha rastet e tërheqjes së pagesës pas datës së vdekjes, si dhe rastet kur përfituesi ka tërhequr pensionin në muajin kur ka ndërruar jetë.
Pavarësisht masave të marra, deri në fund të vitit janë rikuperuar 100,158,608 lekë, ndërsa 647 raste, me një vlerë prej 14,726,760 lekësh, mbeten ende të paarkëtuara dhe kërkojnë ndjekje të vazhdueshme.
Rekomandimet e auditimit
Auditorët i kërkojnë ISSH-së të përshpejtojë ndjeshëm procedurat administrative dhe ligjore për rikuperimin e shumës së mbetur prej 36,604,305 lekësh, duke vijuar bashkëpunimin me postën dhe bankat e nivelit të dytë.
Raporti thekson gjithashtu nevojën për forcimin e mekanizmave të kontrollit paraprak, për të shmangur përsëritjen e këtyre problematikave në të ardhmen. Forcimi i kontrollit dhe transparencës, sipas auditorëve, do të ndihmojë në uljen e humbjeve financiare, rritjen e eficiencës në menaxhimin e fondeve publike, si dhe rikthimin e plotë të shumave të shpenzuara padrejtësisht në buxhetin e shtetit.