“`html
Rritet kredia për tregtinë, hotelerinë dhe ndërtimin, ndërsa financimet për bujqësinë janë në rënie.
Kreditimi i bizneseve ka shënuar një rritje në pjesën e parë të vitit, me një orientim të qartë drejt sektorëve të tregtisë, shërbimeve dhe ndërtimit. Të dhënat e publikuara nga Banka e Shqipërisë tregojnë se gjatë katër muajve të parë të vitit 2026, sektori bankar ka dhënë gjithsej 92.8 miliardë lekë kredi të reja për biznesin, çka përfaqëson një rritje prej 11.4% krahasuar me të njëjtën periudhë të vitit të kaluar.
Sektori i tregtisë mbetet dominues në strukturën e kredisë për ekonominë, duke regjistruar një rritje të lartë edhe në muajt e parë të këtij viti. Kredia e re për tregtinë arriti në 36.2 miliardë lekë në katër muaj, duke shënuar një rritje prej 25.5% krahasuar me vitin paraprak. Kjo kategori përbën tashmë 39% të vlerës së kredisë së re të disbursuar gjatë vitit, duke treguar një rritje të mëtejshme krahasuar me vitin e kaluar. Pavarësisht sinjaleve të dobësisë në kërkesën e brendshme, sektori i turizmit po ndihmon në kompensimin e kësaj situate, duke rritur rolin e shërbimeve të lidhura me të, veçanërisht tregtisë, në ekonominë shqiptare pas pandemisë.
Industria përpunuese renditet e dyta për nga kredia e marrë, me 13.1 miliardë lekë, por ky sektor ka pësuar një rënie prej 4.4% krahasuar me një vit më parë. Pas një performance pozitive në vitin e kaluar, kredia e re për industrinë përpunuese është në rënie këtë vit. Industria në përgjithësi dhe ajo përpunuese në veçanti kanë treguar një ecuri të dobët të prodhimit në vitet e fundit, e cila po fillon të reflektohet edhe në shifrat e huadhënies.
Sektori i tretë më i kredituar është ai i ndërtimit, me një vlerë kredie të re prej 11.7 miliardë lekësh. Kredia e re për ndërtimin u rrit me 11% krahasuar me të njëjtën periudhë të vitit të kaluar, duke mbajtur një ritëm të ngjashëm me rritjen mesatare të kredisë së re për biznesin. Huaja e re për ndërtimin përbën rreth 12.5% të huasë totale për bizneset, në përputhje me ecurinë e vitit të kaluar.
Ndërkohë, aktivitetet e pasurive të paluajtshme kanë shënuar rritje të ndjeshme të kreditimit në muajt e parë të 2026. Kredia e re në këtë sektor arriti në 3.7 miliardë lekë, me një rritje vjetore prej 110%. Sektori që përfshin akomodimin dhe shërbimet ushqimore vijon gjithashtu të tregojë rritje të kreditimit. Kredia e re arriti në 7.6 miliardë lekë, duke u rritur me 78% krahasuar me vitin e kaluar. Pesha e këtij sektori në strukturën e kredisë për biznes u rrit në 8.2%, nga 5.1% një vit më parë. Rritja e kredisë për këtë sektor duket të reflektojë kërkesën ende të lartë për investime të lidhura me turizmin, sidomos në hoteleri dhe kapacitete akomoduese.
Një zhvillim i rëndësishëm është kthimi i rritjes së kreditimit për sektorin energjetik, i cili kishte pësuar një rënie të fortë vitin e kaluar. Për katër muajt e parë të këtij viti, kredia e re për sektorin energjetik arriti në 4.5 miliardë lekë, duke u rritur me 114% krahasuar me një vit më parë.
Në kontrast, sektori i bujqësisë edhe në fillim të këtij viti regjistroi nivele modeste krediti, me vetëm 393 milionë lekë, çka përbën një rënie prej 26% krahasuar me vitin paraprak. Kredia për bujqësinë po vazhdon të tkurret, pavarësisht aplikimit të skemave të ndryshme për lehtësimin e financimit, duke përfshirë një program të sigurimit të fondeve me çmim preferencial nga Banka e Shqipërisë dhe një skemë të re garancie sovrane për kreditë, të zbatuar nga qeveria shqiptare.
“`