Kursi i Euros e nis javën me rënie të mëtejshme, duke arritur një minimum të ri historik në 96.5 lekë.
Kursi i këmbimit të Euros me Lekun ka vijuar rënien edhe këtë javë, duke prekur një minimum të ri historik. Sipas kursit zyrtar të këmbimit të Bankës së Shqipërisë, Euro u këmbye të martën me 96.5 lekë, ndërsa javën e kaluar e kishte mbyllur në vlerën e 96.57 lekëve.
Sipas aktorëve të tregut, presionet rënëse mbi kursin e Euros, të cilat kanë qenë të pranishme gjatë gjithë gjysmës së dytë të vitit, janë forcuar në dhjetor për shkak të periudhës festive. Kjo periudhë shoqërohet me rritje të flukseve valutore të lidhura me turizmin dhe emigrantët.
Deri tani, ndërhyrjet e vazhdueshme të Bankës së Shqipërisë kanë arritur të balancojnë presionin e tregut mbi monedhën europiane dhe kanë bërë që kursi i këmbimit të jetë më i qëndrueshëm krahasuar me dy vitet e mëparshme. Rënia vjetore e kursit Euro-Lek aktualisht është më e vogël se 2%.
Sipas të dhënave nga tregu, të premten e kaluar Banka Qendrore bleu 15.1 milionë euro në ankandin e planifikuar të blerjes së valutës, si pjesë e kalendarit vjetor të blerjeve në funksion të objektivave të rezervës valutore. Një ditë më parë, më 4 dhjetor, Banka e Shqipërisë kishte kryer gjithashtu blerje direkte të valutës, me qëllim mbajtjen nën kontroll të rënies së Euros, e cila një ditë më parë, më 3 dhjetor, kishte zbritur në një minimum të ri historik.
Për të dytin vit radhazi, Banka e Shqipërisë po ndërmerr blerje të mëdha në tregun e brendshëm valutor, me synimin për të mos lejuar forcimin e mëtejshëm të Lekut. Sipas informacionit zyrtar të Bankës së Shqipërisë, në vitin 2024 u blenë në tregun valutor 933 milionë euro. Ndërsa, sipas deklaratave të Guvernatorit Sejko, për nëntë muajt e parë të këtij viti, Banka Qendrore ka blerë rreth 800 milionë euro të tjera.
Ecuria e kursit të këmbimit tregon se dhjetori ka gjasa të theksojë akoma më shumë tendencën rënëse të Euros, megjithëse pritet që ndërhyrjet e Bankës së Shqipërisë ta mbajnë lëvizjen e kursit në intervale të vogla.
Ndërkohë, një rritje e përkohshme e Euros mund të jetë e pritshme gjatë ditëve të fundit të dhjetorit, për shkak të tendencës së zakonshme të qeverisë për të shpenzuar pjesën më të madhe të deficitit buxhetor në këtë periudhë. Shpenzimet e përqendruara të qeverisë sjellin një rritje të fortë të ofertës së Lekut në treg, duke ndikuar në një zhvlerësim afatshkurtër të tij kundrejt Euros. Edhe këtë vit, politika fiskale ka luajtur një rol shtesë në forcimin e monedhës vendase.
Në fund të 10-mujorit 2025, buxheti ishte në suficit të konsiderueshëm, në vlerën e 49.2 miliardë lekë. Suficiti i lartë buxhetor ka ulur ofertën e monedhës vendase në treg dhe ka nxitur më tej tendencat e saj mbiçmuese.