“`html
Kurum International do të investojë 150 milionë euro për prodhimin e çelikut të gjelbër.
Kurum International Albania dhe Danieli Officine Meccaniche S.p.A. njoftojnë zyrtarisht nënshkrimin e një kontrate të re investimi për ndërtimin e një impianti të ri për prodhimin e çelikut në Zonën Industriale të Metalurgjikut në Elbasan. Ceremonia e nënshkrimit u zhvillua në Tiranë, në prani të përfaqësuesve të institucioneve qendrore dhe vendore, partnerëve strategjikë dhe të ftuarve.
Fabrika e re do të ndërtohet duke përdorur teknologjinë MIDA Steel Concept të kompanisë Danieli, një lider botëror në inxhinierinë dhe teknologjinë e industrisë së çelikut.
Drejtori i Financës i Kurum International, Z. Arif Shkalla, theksoi rëndësinë e kësaj dite për kompaninë, duke nënshkruar një partneritet strategjik dhe një kontratë të rëndësishme për ndërtimin e një fabrike të re të çelikut në Elbasan, me një vlerë investimi prej 150 milionë euro.
Ai shtoi: “Për herë të parë në Europë, koncepti MIDA, i cili bazohet në çelik të gjelbër, futet në këtë industri. Kjo do të sjellë një zhvillim të qëndrueshëm me rëndësi të veçantë për ambientin, pasi ka emetim zero të karbonit në atmosferë. Ky projekt nuk është vetëm një investim industrial, por është një angazhim i qartë për zhvillim të qëndrueshëm, modernizim teknologjik dhe vlerë afatgjatë. Me ndërtimin e impiantit të parë MIDA në Europë, Shqipëria forcon pozicionin e saj strategjik dhe do të jetë konkurruese në të ardhmen e afërt europiane.”
Me realizimin e këtij projekti, Shqipëria do të bëhet vendi pritës i impiantit të parë MIDA Steel në Europë, duke u pozicionuar drejtpërdrejt në tregun europian të çelikut të gjelbër.
Teknologjia MIDA mundëson efikasitet të lartë energjetik, reduktim të ndjeshëm të ndikimit mjedisor dhe standarde të avancuara prodhimi, në përputhje me politikat europiane për dekarbonizimin e industrisë.
Përfaqësuesi i Danieli Group, Z. Federico Rocchetti, vuri në dukje se impianti i zgjedhur nga Kurum implementohet për herë të parë në Europë. Ai deklaroi: “Ky koncept i ri në prodhimin e çelikut për ndërtim, ul ndjeshëm konsumin e energjisë, minimizon emetimet e karbonit, duke plotësuar kushtet dhe duke garantuar parametrat mjedisore perfektë për çertifikimin si çelik i gjelbër, për të siguruar një rritje të qëndrueshme ekonomike të rajonit të Elbasanit dhe duke rijetësuar industrinë shqiptare.”
Kryetari i Bashkisë Elbasan, Gledian Llatja, përshëndeti projektin, duke theksuar: “Ne, si bashki, po lidhim kontratat klimatike ku KURUM, së bashku me biznese të tjera në zonën industriale, janë ndër të parët me të cilët kemi filluar diskutimet që prej vitit 2021, dhe të cilët treguan një qasje pozitive drejt ndryshimit të teknologjisë.”
Investimi total për këtë projekt arrin rreth 150 milionë Euro, me një kapacitet prodhimi vjetor prej afro një milion ton hekur ndërtimi dhe produkte të tjera të çelikut. Kohëzgjatja e projektit është 24 muaj. Me vënien në punë të kësaj fabrike të re, do të rikthehen eksportet e çelikut shqiptar në rajon, me synim tregjet europiane, duke u përshtatur me udhëtimin e Shqipërisë drejt pranimit në Bashkimin Europian.
Investimi pritet të kontribuojë ndjeshëm në modernizimin industrial, krijimin e vendeve të reja të punës, rritjen e prodhimit me vlerë të shtuar dhe forcimin e zinxhirit industrial vendas. Njëkohësisht, projekti përforcon rolin e Elbasanit si qendër industriale strategjike dhe rrit atraktivitetin e Shqipërisë për investime të avancuara dhe të përgjegjshme ndaj mjedisit.
“`