Rasti Epstein: Ish-Sekretari i Thesarit të SHBA-së njofton tërheqjen nga jeta publike
Lawrence “Larry” Summers, ish-sekretari i Thesarit të SHBA-së dhe më vonë president i Universitetit të Harvardit në fillim të viteve 2000, njoftoi të hënën se do të tërhiqet nga jeta publike. Ky vendim vjen pas daljes në dritë të komunikimeve të tij me Jeffrey Epstein, i njohur për lidhjet e tij me figura të larta shoqërore dhe i dënuar për abuzim seksual, ku përfshiheshin edhe të mitur.
Në një deklaratë, Summers u shpreh se “merr përgjegjësi të plotë për vendimin e pamatur për të vazhduar komunikimin” me Epstein. Ai theksoi se, megjithëse do të vazhdojë detyrimet e tij akademike si pedagog i ekonomisë, administrimit publik dhe administrimit të biznesit në Harvard, do të tërhiqet nga paraqitjet e tij publike.
“Ky është një hap në kuadër të një përpjekjeje më të gjerë për të rivendosur besimin dhe për të riparuar marrëdhëniet e mia me ata që janë afër meje,” shtoi ai në deklaratë.