Ledian Memushaj ka nisur një kapitull të ri dhe të rëndësishëm në karrierën e tij, pasi është prezantuar si trajneri më i ri i skuadrës së Team Altamura në Serinë C italiane.
Ish-mesfushori i Kombëtares, i cili ka filluar tashmë karrierën e trajnerit, provoi Serinë D me klubin e Leon, dhe tani është ngjitur një kategori më lart, te një klub që beson se ai mund të bëjë një hap tjetër përpara.
Këtë besim e dëshmojnë edhe fjalët e drejtorit sportiv të klubit, Mateo Lauriola:
“Ai është një surprizë si trajner, por e njoh që nga koha e tij te Karpi dhe Leçe. Si lojtar, ai ishte një lider. E kontaktova edhe vitin e kaluar, por ekzistonte faktori i panjohur i një grupi të ri, një kategorie të re dhe ai si një fillestar. Ai do të bëjë të flitet për të sepse është një trajner me një prirje të fortë ofensive dhe koncepte që përputhen mirë me grupin që kemi tashmë. Projekti tekniko-taktik po vazhdon, pavarësisht ndryshimit në pankinë. Ai ka shumë personalitet dhe koncepte të qarta”,
tha drejtuesi, i cili i ka besuar skuadrën Memushajt.