Libani heq dënimin me vdekje, bëhet i pari vend arab që e zëvendëson me burgim të përjetshëm.
Parlamenti i Libanit ka votuar për heqjen e dënimit me vdekje, duke e zëvendësuar atë me burgim të përjetshëm dhe punë të detyruar në rrethana rënduese. Me këtë vendim, Libani bëhet vendi i parë në botën arabe që ndërmerr një ndryshim të tillë në legjislacionin penal.
Ndryshimi ligjor u miratua me shumicë dërrmuese në parlament, ndërsa blloku parlamentar i Hezbollahut votoi kundër heqjes së dënimit me vdekje.
Megjithëse Libani nuk ka kryer ekzekutime që prej janarit të vitit 2004, gjykatat kanë vijuar të japin dënime me vdekje gjatë këtyre viteve. Për dekada, vendi kishte zbatuar një moratorium de facto mbi ekzekutimet.
Ministri i Drejtësisë, Adel Nassar, e cilësoi vendimin si një “hap historik”, duke theksuar se tashmë moratoriumi i gjatë shndërrohet në një heqje institucionale të dënimit kapital.
Vendimi shënon një ndryshim të rëndësishëm në sistemin penal libanez dhe e rendit vendin mes shteteve që kanë hequr zyrtarisht dënimin me vdekje nga legjislacioni i tyre.