Lufta në Ukrainë, Putini i hapur për shkëmbim territoresh, por synon të marrë të gjithë Donbasin.
Presidenti rus Vladimir Putin ka deklaruar se mund të jetë i hapur për shkëmbimin e një pjese të territoreve që aktualisht kontrollohen nga forcat ruse në Ukrainë, megjithatë synimi kryesor mbetet marrja e të gjithë rajonit të Donbasit. Ky informacion u raportua nga gazeta ruse “Kommersant”.
Sipas Andrey Kolesnikov, gazetar i “Kommersant” dhe njohës i çështjeve të Kremlinit, Putin ka informuar biznesmenët më të fuqishëm të Rusisë lidhur me detajet e këtij plani gjatë një takimi të zhvilluar të enjten vonë në Kremlin.
“Vladimir Putin ka deklaruar se pala ruse vazhdon të jetë e gatshme për lëshimet që janë bërë në Anchorage. Putini kërkon të gjithë Donbasin, por jashtë këtij rajoni nuk përjashtohet një shkëmbim i pjesshëm territoresh nga ana e Rusisë”, thuhet në artikullin e “Kommersant”.
Në të njëjtën kohë, presidenti ukrainas Volodymyr Zelensky ka njoftuar se delegacionet e Ukrainës dhe Shteteve të Bashkuara janë në fazën finale të finalizimit të një plani me 20 pika, si rezultat i bisedimeve të zhvilluara në Miami gjatë fundjavës. Megjithatë, Zelensky ka theksuar se nuk është arritur pajtim për kërkesat që Ukraina të heqë dorë nga pjesët e Donbasit që ende i kontrollon, si dhe për të ardhmen e centralit bërthamor të Zaporizhias, i cili aktualisht ndodhet nën kontrollin e forcave ruse.
Presidenti amerikan Donald Trump ka premtuar vazhdimisht se do t’i japë fund luftës, e cila cilësohet si më vdekjeprurësja në Evropë që nga Lufta e Dytë Botërore. Emisari i tij, Steve Witkoff, dhe këshilltari e dhëndri i tij, Jared Kushner, po zhvillojnë negociata me Rusinë, Ukrainën dhe fuqitë evropiane.