## Në kërkim të marrëdhënies së mirë: Si Vuçiç po i ofron ‘gjithçka’ Trump
Presidenti serb Aleksandar Vuçiç ka finalizuar një marrëveshje të pazakontë dhe të mbajtur në fshehtësi për gati një vit, duke i dhënë kompanisë së Jared Kushner-it, dhëndrit të Donald Trump, kontroll pothuajse të plotë mbi një nga parcelat më strategjike në zemër të Beogradit. Dokumente të publikuara nga revista Radar zbulojnë se qeveria serbe dhe kompania Atlantic Incubation Partners LLC kanë krijuar një ndërmarrje të përbashkët, në të cilën Kushner kontrollon 77.5% të projektit, ndërsa shteti serb vetëm 22.5%.
Marrëveshja parasheh:
* Një kontratë qiraje për 99 vite falas për kompaninë e Kushner-it, me mundësi kalimi në pronësi të plotë.
* Detyrimin e shtetit serb për të hequr statusin e mbrojtur kulturor të ish-selisë së Ushtrisë së Serbisë, e cila u bombardua nga NATO në vitin 1999.
* Detyrimin për të shembur të gjitha ndërtesat ekzistuese dhe për të dorëzuar truallin “gati për ndërtim” deri në maj 2025.
* Në rast se Serbia nuk e përmbush afatin, kompania e Kushner-it ka të drejtë të prishë kontratën dhe të kërkojë penalizime financiare të konsiderueshme.
Ky projekt, i cili përfshin ndërtimin e një hoteli, apartamentesh dhe një muzeu, u mbajt sekret nga qeveria e Vuçiç deri në momentin kur parlamenti serb miratoi një ligj të posaçëm për përshpejtimin e tij, duke anashkaluar kontrollet rregullatore dhe hetimet për falsifikim dokumentesh.
Ndërkohë, studentët dhe qytetarët kanë protestuar masivisht, duke e cilësuar marrëveshjen si “shitje të Beogradit” dhe një favor të qartë për familjen Trump. Kritikët vënë në dukje se Vuçiç po ofron çdo gjë që kërkojnë Trump dhe Kushner: tokë, leje ndërtimi, status kulturor dhe madje edhe shembjen e objekteve shtetërore, në përpjekje për të fituar mbështetjen politike të një administratë të ardhshme Trump.
Këto zhvillime vijnë në një kohë kur Shtetet e Bashkuara kanë vendosur sanksione ndaj industrisë serbe të naftës (NIS) për shkak të kontrollit rus, ndërsa qeveria Vuçiç kërcënon të mbyllë mediat e pavarura si N1, Nova dhe Radio Free Europe. Të gjitha këto veprime krijojnë një panoramë ku Serbia po dhuron pasuri publike strategjike për familjen Trump, ndërkohë që shtyp mediat dhe anashkalon ligjin për të avancuar projektin e Kushner-it.
©LAPSI.AL