Firmoset marrëveshja 6 mld dollarë për gazin mes Shteteve të Bashkuara, Shqipërisë dhe Greqisë
Një marrëveshje e rëndësishme prej 6 miliardë dollarësh është firmosur mes kompanisë shqiptare Albgaz dhe dy kompanive të mëdha ndërkombëtare, amerikane dhe greke, në fushën e energjisë.
Marrëveshja, me afat 20-vjeçar, synon ndërtimin e infrastrukturës në Vlorë për importin e gazit natyror të lëngshëm (LNG) nga SHBA me anije dhe rigazifikimin e tij për furnizimin e Europës Jugore.
Kryeministri Edi Rama deklaroi se Shqipëria synon të bëhet një vend eksportues neto i energjisë brenda këtij mandati. Ai theksoi:
- “OSHEE, deri një dekadë më parë, ishte në prag të falimentimit dhe mbijetonte falë subvencioneve qeveritare, me një borxh që tejkalonte 5% të PBB-së. Sot, energjia përcakton sigurinë tonë, fuqinë tonë ekonomike dhe ambicien për pozicionin që zëmë në rajon dhe Europë: të arrijmë, brenda këtij mandati, të shndërrohemi në një vend eksportues neto të energjisë.”
- “Një element kyç i këtij procesi është partneriteti me SHBA, që mbështetet në angazhimin e përbashkët ndaj sigurisë energjetike. Vlora do të bëhet një pikë kritike për energjinë në Europën Juglindore.”
- “Theksoj rëndësinë e asaj që tha ambasadorja Guilfoyle, për nevojën tonë, të Greqisë dhe të Shqipërisë, për të forcuar lidhjen dhe bashkëpunimin në shumë drejtime, por sidomos në fushën e furnizimit me energji, prodhimit, rezistencës dhe pavarësisë.”
- “Partneriteti i Shqipërisë dhe SHBA dërgon një mesazh të qartë: edhe vendet e vogla mund të ndërmarrin hapa të guximshëm dhe të jenë pjesë e zgjidhjes së sfidave më urgjente të kohëve tona.”
Ambasadorja amerikane në Athinë, Kimberly Guilfoyle, deklaroi se marrëveshja prej 6 miliardë dollarësh mes SHBA, Greqisë dhe Shqipërisë forcon sigurinë energjetike dhe kombëtare.
Ajo shtoi:
- “Ky bashkëveprim forcon sigurinë energjetike dhe kombëtare. Në sektorin energjetik, siguria dhe ekonomia ecin krah për krah. Presidenti Trump ka qenë një mbështetës i zjarrtë i sigurisë energjetike dhe administrata e tij e ka ngritur këtë çështje si një shtyllë në mbarë botën.”
- “Ndërsa flasim për fuqi rajonale, dua të pranoj rëndësinë e lidhjeve të forta Shqipëri-Greqi. Këto marrëdhënie tejkalojnë thjesht atë të fqinjëve të afërt dhe bashkëpunimit ekonomik.”
- “Kur SHBA-të, Shqipëria dhe Greqia punojnë së bashku, i gjithë rajoni përfiton.”