Rënia e gurëve nga reshjet, mbyllet hyrja në Unazën e Pogradecit
Bashkia e Pogradecit ka njoftuar drejtuesit e automjeteve se segmenti hyrës i Unazës së qytetit, duke ardhur nga Qafa e Thanës, do të jetë përkohësisht i mbyllur për qarkullim.
Kjo masë merret për shkak të rrezikut të rënies së gurëve, si pasojë e dëmtimit të një pjese të skarpatës nga reshjet e fundit. Njoftimi specifikon se “vetëm hyrja për në Unazë” është e prekur.
Punonjësit në terren do të vijojnë edhe nesër punën për stabilizimin dhe përmirësimin e skarpatës së kodrës. Hapja e këtij segmenti do të bëhet e ditur në një moment të dytë, sapo të përfundojnë punimet dhe të garantohet siguria, thuhet në njoftim.