“Më luti të bënim një foto”/ Meloni i përgjigjet deklaratave të Trump: Unë dhe Italia nuk lutemi kurrë
Kryeministrja e Italisë, Giorgia Meloni, ka shprehur habinë e saj pas deklaratave të Presidentit Donald Trump në një intervistë për një media italiane, ku ai pretendoi se ajo i ishte “lutur” për një fotografi së bashku. Në një postim video në rrjetet sociale, Meloni theksoi se komentet e tij ishin plotësisht “të sajuara”.
Kjo përplasje publike sugjeron një përkeqësim të marrëdhënieve mes dy liderëve, të cilët deri më tani kanë pasur një raport shumë të afërt. Trump dhe Meloni u panë duke biseduar ngushtë gjatë samitit të G7 në Evian-les-Bains, Francë, javën e kaluar, ndërsa Meloni u tha më pas gazetarëve se marrëdhënia e tyre kishte mbetur e pandryshuar.
Megjithatë, Trump, në një intervistë telefonike për kanalin televiziv italian La7, ka pretenduar: “Ajo më luti të bëja një foto me të; më erdhi keq për të.”
Meloni, duke iu drejtuar shtatë milionë ndjekësve të saj në Instagram, deklaroi se ishte “sinqerisht e tronditur”. Ajo shtoi: “Nuk e di pse presidenti amerikan sillet në këtë mënyrë ndaj aleatëve. Kjo nuk është hera e parë që ndodh. Mund të them vetëm se është për të ardhur keq që ai nuk tregon të njëjtën vendosmëri ndaj armiqve të Perëndimit dhe ndaj armiqve të SHBA-së – [armiq] me udhëheqësit e të cilëve ai duket se është shumë më i butë. Por ka një gjë që ai duhet ta mbajë mend: as unë dhe as Italia nuk lypim kurrë”, përfundoi ajo.
Për t’u bërë pjesë e grupit “Balkanweb” mjafton të klikoni: dhe kërkesa do t’ju aprovohet menjëherë.