Ministria e Financave do të emetojë për herë të parë obligacione 2.5-vjeçare
Ministria e Financave do të përdorë për herë të parë gjatë vitit 2026 një instrument të ri të huamarrjes së brendshme: obligacionet 2.5-vjeçare.
Sipas kalendarit të huamarrjes për tremujorin e parë të vitit 2026, Ministria e Financave ka planifikuar zhvillimin e ankandit në muajin janar. Ky ankand do të ketë dy rihapje, në muajt shkurt dhe mars.
Qëllimi i emetimit për herë të parë të një obligacioni me një periudhë jo të plotë vjetore është ulja e përqendrimit të maturimeve të borxhit të brendshëm në tremujorin e parë të vitit. Ky tremujor është periudha me përqendrimin më të lartë të emetimit të instrumenteve të borxhit të brendshëm.
Të dhënat nga Ministria e Financave tregojnë se, për tremujorin e parë të vitit 2026, vlera e borxhit të emetuar (duke përfshirë rifinancimet) do të jetë 134 miliardë lekë, ose më shumë se 35% e vlerës totale vjetore të emetimeve të parashikuara.
Ky përqendrim reflektohet edhe në strukturën e maturimeve të instrumenteve. Në tremujorin e parë të vitit 2026, vlera e borxhit të maturuar do të arrijë në 164.4 miliardë lekë. Kjo shumë përbën më shumë se 49% të vlerës totale të borxhit që maturohet gjatë gjithë vitit 2026.
Emetimi i instrumenteve me maturim 2.5 vjeçar do të zhvendosë maturimin e borxhit përkatës në tremujorin e tretë të vitit 2028. Kjo do të mundësojë në të ardhmen një shpërndarje më të balancuar të emetimeve dhe maturimeve të borxhit të brendshëm përgjatë vitit kalendarik.
Gjatë vitit 2026, Ministria e Financave ka planifikuar një vlerë totale emetimesh të bonove dhe obligacioneve në tregun e brendshëm prej 380.1 miliardë lekësh. Duke zbritur vlerën e borxhit të maturuar dhe të riblerjeve (buy back), huamarrja e re neto do të ketë vlerën e 45 miliardë lekëve, duke shënuar një rënie nga niveli prej 50 miliardë lekësh i vitit 2025.
Tregu i bonove dhe obligacioneve të qeverisë shqiptare në dy vitet e fundit është karakterizuar nga një tendencë në rritje të yield-eve. Gjatë vitit 2025, yield-et e titujve më afatgjatë prekën madje nivelet më të ulëta historike, ndërsa yield-et e bonove të thesarit qëndruan pranë ose poshtë normës bazë të interesit.
Kërkesa më e moderuar nga qeveria për financim ka qenë një ndër faktorët, paralelisht me përmirësimin e vlerësimit të riskut të borxhit sovran nga agjencitë e specializuara. Kjo ka sjellë edhe rritjen e spektrit të investitorëve të interesuar, duke përfshirë edhe subjekte nga jashtë vendit dhe rrjedhimisht rritjen e kërkesës në ankandet e titujve qeveritarë.