Senatori amerikan Mitch McConnell del nga rehabilitimi pas disa javësh trajtim
Senatori amerikan Mitch McConnell është liruar nga qendra e rehabilitimit ku qëndroi për disa javë dhe është kthyer në shtëpinë e tij të enjten. Ende nuk dihet se kur do t’i rikthehet angazhimeve politike.
Sipas mediave amerikane, politikani 84-vjeçar nga Kentucky nuk është shfaqur në publik që prej shtrimit të tij në spital në mesin e muajit qershor. Për disa ditë, zyra e McConnell nuk dha detaje për gjendjen e tij shëndetësore, duke nxitur spekulime për një përkeqësim të gjendjes së tij.
Më vonë, stafi i tij publikoi fotografi të senatorit së bashku me bashkëshorten dhe sqaroi se ai kishte pësuar një rrëzim në banesë, që e kishte lënë përkohësisht pa ndjenja. Pas kësaj, ai u diagnostikua edhe me një formë të lehtë pneumonie.
Megjithatë, mbetet ende e paqartë nëse McConnell do të jetë në gjendje të rikthehet në punën e tij në Senatin amerikan gjatë pjesës së mbetur të mandatit, i cili përfundon në janar.
McConnell, një nga figurat më të rëndësishme të Partisë Republikane në dekadat e fundit dhe ish-lider i shumicës në Senat, ka bërë të ditur më herët se nuk do të kandidojë për një mandat të tetë në Kongres.