Titulli: Lojtari gjerman, Niklas Zyle, njofton tërheqjen nga futbolli në moshën 30-vjeçare: “Qava për dhjetë minuta!”
Një lajm i papritur ka ardhur nga Gjermania, ku ylli i Borussia Dortmund dhe kombëtares gjermane, Niklas Zyle, ka vendosur të tërhiqet nga futbolli profesionist në fund të këtij sezoni, duke qenë vetëm 30 vjeç.
Mbrojtësi gjerman përmendi si arsye kryesore problemet e vazhdueshme fizike. Ai shpjegoi se lëndimet kanë pasur një ndikim vendimtar në vendimin e tij. Gjatë karrierës së tij, Zyle është përballur me një sërë pengesash, përfshirë dy këputje serioze të ligamentit dhe mbi 130 ndeshje të humbura për klubin dhe kombëtaren, gjë që ka penalizuar karrierën e tij në nivelet më të larta.
Mbrojtësi tregoi momentin më të fundit që përshpejtoi vendimin e tij, të lidhur me dëmtimin në gju që pësoi kundër Hoffenheim. “Ajo që ndjeva kur mjeku i ekipit kreu testin në dhomën e zhveshjes, shikoi fizioterapistin dhe tundi kokën… Shkova në dush dhe qava për dhjetë minuta. Në atë moment, mendova vërtet: ‘Është këputur përsëri’.”
Ai shtoi se frika nga një dëmtim i ri serioz ndryshoi gjithçka. “Kur të nesërmen bëra rezonancën magnetike dhe mora lajmin e mirë se nuk ishte një ligament, ishte 100% e qartë për mua se kishte mbaruar. Nuk mund të imagjinoja asgjë më të keqe sesa të filloja përsëri me një tjetër dëmtim të ligamentit kroçiat. Nuk mund ta imagjinoja të kaloja nëpër të njëjtin proces për herë të tretë, midis rehabilitimit dhe muajve jashtë fushës, ndërsa jeta vazhdon pa ty,” tha lojtari, i cili ka luajtur në nivelet më të larta edhe me Bayern Munich, me të cilin fitoi edhe Ligën e Kampioneve.