## Televizioni izraelit publikon detajet e operacionit “Maçoku me çizme”: Si do të arrinin luftëtarët kurdë në Teheran për të përmbysur regjimin dhe roli i ish-presidentit Ahmedinexhad
**Data:** 14.07.2026
Stacioni televiziv izraelit Channel 13 ka publikuar detaje rreth një operacioni të planifikuar nga shërbimi inteligjent izraelit, Mossad, i koduar “Maçoku me çizme”, me qëllim përmbysjen e regjimit iranian. Plani parashikonte përdorimin e ish-presidentit iranian, Mahmoud Ahmadinejad, si një figurë kyçe.
Plani, i cili fillimisht kishte mbështetjen e Uashingtonit, parashikonte sulme izraelite kundër pozicioneve të Gardës Revolucionare përgjatë kufirit Iran-Irak, në rajonin e Kurdistanit iranian. Qëllimi i këtyre sulmeve ishte të krijohej një korridor për hyrjen e luftëtarëve kurdë në territorin iranian dhe përparimin e tyre drejt qyteteve kurde në veriperëndim të vendit. Mossad vlerësonte se mijëra të rinj kurdë do t’u bashkoheshin këtyre forcave, duke formuar një lëvizje masive që mund të arrinte deri në Teheran. Faza e mëvonshme e planit përfshinte mobilizimin e miliona protestuesve në rrugë, duke synuar kështu rrëzimin e regjimit.
### Roli kyç i Ahmadinexhadit
Një pjesë thelbësore e planit ishte fronti kurd, i cili, sipas Channel 13, parashikonte që ish-presidenti iranian Mahmoud Ahmadinejad, i njohur për qëndrimet e tij të ashpra, të merrte kontrollin e vendit. Në të njëjtën kohë, gazeta New York Times raportoi se Izraeli kishte zhvilluar një përpjekje shumëvjeçare për të kontaktuar dhe kthyer Ahmadinejadin në pushtet. Sipas gazetës amerikane, si pjesë e këtij angazhimi, një takim mes Ahmadinexhadit dhe ish-kreut të Mossadit, David Barnea, u zhvillua në vitin 2024, në margjinat e një konference akademike në Hungari.
### Planet u braktisën
Raporti gjithashtu thekson se, pas shpërthimit të luftës, Izraeli dhe Shtetet e Bashkuara kishin nisur sulme të gjera kundër forcave të sigurisë iraniane në veriperëndim të vendit, duke synuar zyrtarë të regjimit, baza ushtarake, sisteme raketore, stacione policore dhe objekte të milicisë Basij, me qëllim lehtësimin e avancimit të forcave kurde. Megjithatë, sipas Channel 13, rrjedhjet e informacionit në media, presioni nga Turqia dhe hezitimi i vetë kurdëve bënë që Uashingtoni të tërhiqte mbështetjen e tij për planin. Si pasojë, ky i fundit nuk u realizua dhe mbeti vetëm në letër.