Një studim i ri përmbys gjithçka që dinim për origjinën e Homo sapiens: Afrika Jugore fsheh misterin e madh
Një studim i fundit, i publikuar në revistën shkencore Nature, sfidon narrativën tradicionale mbi origjinën e Homo sapiens, duke vendosur Afrikën e Jugut në qendër të kësaj enigme. Analiza gjenetike e mbetjeve të lashta njerëzore sugjeron se popullatat që jetuan në këtë rajon mbetën të izoluara për rreth 100,000 vjet. Ky zbulim çon në idenë se koncepti i “njeriut modern” mund të përfshijë kombinime të ndryshme gjenetike.
Shkencëtarët kanë analizuar ADN-në e 28 individëve nga rajoni në jug të lumit Limpopo. Mbetjet e tyre mbulojnë një periudhë kohore që shtrihet nga mbi 100,000 vjet më parë deri në rreth dy shekuj më parë. Krahasimi me popullatat e tjera nga Afrika, Europa, Azia, Amerika dhe Oceania tregon se individët nga Afrika e Jugut, rreth 1,400 vjet më parë, kishin tipare gjenetike dukshëm të ndryshme nga popullatat moderne.
Analiza nuk ka zbuluar shenja të ndërthurjes me popullata të jashtme deri në shekullin e gjashtë, duke kundërshtuar kështu teoritë e mëparshme për kontakte të vazhdueshme midis rajoneve të ndryshme të kontinentit. Studimi identifikon gjithashtu variacione gjenetike të rëndësishme të lidhura me funksionin e veshkave dhe zhvillimin neuronal. Këto gjetje ofrojnë informacione të reja mbi adaptimet e njerëzve të hershëm dhe tiparet që kanë luajtur një rol vendimtar në evolucionin e tyre.