“`html
Behgjet Pacolli Reagon: E Vërteta mbi Manipulimin me Aksionet e Aeroportit të Vlorës
Biznesmeni kosovar Behgjet Pacolli ka reaguar lidhur me përplasjen për aksionet e aeroportit të Vlorës me ortakun e tij, Valon Ademi, administrator i kompanisë “2A Group”. Pacolli akuzon noteren Valbona Selimi, duke pretenduar se ajo, me anë të një akti noterial të fshehtë dhe me deklarime të pavërteta, pa dijeninë e tij, i ka kaluar 47% të aksioneve në emër të kompanisë “2A Group” të Valon Ademit.
Sipas Pacollit, noterja Selimi, në një akt noterial të vitit 2023, të cilin e cilëson si prokurë, ka përfshirë deklarime të rreme. Ajo pretendon se Pacolli ka qenë fizikisht i pranishëm në zyrën e saj, se e ka identifikuar, ia ka lexuar aktin në prani të një përkthyeseje të gjuhës angleze dhe se ai ka nënshkruar dokumentin pas miratimit të tij.
Pacolli mohon të ketë qenë ndonjëherë në zyrën e noteres Selimi, të mos e njohë atë dhe të mos ketë nënshkruar kurrë ndonjë akt në praninë e saj.
Ai shton se ky akt noterial përbën një element themelor të veprimtarisë së dyshuar të kundërligjshme të ndërmarrë nga Valon Lluka. Sipas Pacollit, Lluka ka tentuar në fillim të muajit prill të realizojë transferimin e 47% të aksioneve, duke e mbajtur të fshehur deri në momentin e zbulimit të rastësishëm më 18 gusht 2025.
Deklarata e Plotë:
Në respekt të së drejtës për informim të opinionit publik, deklaroj sa vijon:
Sipas njoftimeve të publikuara sot në media, noterja në Tiranë, znj. Valbona Selimi, ka pretenduar se palët kanë qenë të pranishme gjatë nënshkrimit të aktit të transferimit të aksioneve nga MABCO Construction SA në shoqërinë “2A”.
Me këtë rast, sqaroj publikisht se as unë dhe as ndonjë person i autorizuar nga MABCO Construction SA, me seli në Lugano, pronare e 98% të aksioneve të cilat rrjedhin nga investimi në Aeroportin Ndërkombëtar të Vlorës, nuk kemi qenë ndonjëherë në zyrën e saj, nuk e kemi takuar noteren Selimi, nuk kemi pasur asnjë komunikim me të apo me përfaqësues të saj dhe nuk kemi nënshkruar asnjë dokument apo prokurë në praninë e saj. Madje, deri më sot, nuk kemi dijeni se ku ushtron aktivitetin e saj noterial.
Megjithatë, në një akt noterial të vitit 2023, të cilin noterja e përdori në mënyrë joligjore si pjesë të dokumentacionit për transfer të pronës dhe të cilin ajo e cilëson si prokurë, noterja Selimi ka përfshirë deklarime të pavërteta. Ajo pretendon me shkrim se unë, Behgjet Pacolli, paskam qenë fizikisht i pranishëm në zyrën e saj, ajo paskësh kryer identifikimin tim, më paskësh lexuar aktin në prani të një përkthyeseje të gjuhës angleze dhe se, pas miratimit tim, paskam nënshkruar dokumentin përkatës.
Këto pretendime janë plotësisht të rreme. Unë nuk e njoh noteren Selimi. Asnjëherë nuk kam nënshkruar ndonjë akt në prezencën e saj. Unë nuk kam qenë asnjëherë në zyrat apo ambientet e saj dhe nuk kam dijeni për ekzistencën e një përkthyeseje të tillë. Asnjë tekst nuk më është lexuar apo paraqitur ndonjëherë për nënshkrim nga ajo ose nga ndonjë person përfaqësues i saj në lidhje me aktet e përmendura.
Në vijim, theksoj se ky akt noterial përbën një element themelor të veprimtarisë së dyshuar të kundërligjshme të ndërmarrë nga z. Valon Lluka me bashkëpunëtorë, i cili në fillim të muajit prill ka tentuar të realizojë transferimin e 47% të aksioneve, duke e mbajtur atë të fshehur deri në momentin kur është zbuluar rastësisht katër muaj më vonë, më 18 gusht 2025, në dokumentacionin e ish-administratorit të shoqërisë VIA. Ky akt, i kryer në mënyrë të fshehtë, përbën burimin dhe shkakun fillestar të kësaj situate me të cilën po përballemi sot.
“`