Masat për foltoren e PD te kryeministria: 350 policë në terren
Policia e Shtetit ka publikuar planin e masave për garantimin e rendit dhe mbarëvajtjes së foltores së Partisë Demokratike, e cila mbahet çdo të hënë para kryeministrisë nga ora 18:00 deri në 20:00.
Rreth 350 efektivë policie do të jenë në terren për sigurimin e zhvillimit të këtij aktiviteti politik. Ky numër është më i lartë se në të hënat e kaluara, ku numri i policëve nuk ka kaluar 250.
Nga ora 15:00 deri në përfundim të tubimit, do të ketë bllokim të qarkullimit të automjeteve në Bulevardin “Dëshmorët e Kombit”, nga kryqëzimi pranë Ministrisë së Brendshme deri te Sheshi “Nënë Tereza”, si edhe në rrugët “Ukraina e Lirë”, “Papa Gjon Pali II” dhe “Ismail Qemali”.
Në varësi të zhvillimit të tubimit, mund të vendosen kufizime të përkohshme të qarkullimit edhe në akse të tjera rrugore. Policia e Tiranës ka parashikuar devijimin e trafikut në rrugë alternative për të lehtësuar lëvizjen e qytetarëve.
Policia e Tiranës apelon që drejtuesit e automjeteve të shmangin lëvizjen në akset që do të bllokohen dhe të përdorin itinerare alternative, në mënyrë që të mos pengohet lëvizja e lirë e pjesëmarrësve në tubim.