VIDEO/ Situatë e pazakontë në Kongresin e Meksikos, deputetet kapen prej flokësh. Pamjet bëhen virale
Tensione të ashpra shpërthyen në Kongresin e Qytetit të Meksikos, ku ligjvënësit u përleshën me njëri-tjetrin, duke rezultuar në pamje që u bënë virale në internet.
Pamjet tregojnë ligjvënëset duke u shtyrë, bërtitur dhe tërhequr flokët njëra-tjetrës në podiumin kryesor të sallës. Incidenti ndodhi gjatë një debati mbi një propozim për reformë, i cili synonte shfuqizimin e autoritetit të pavarur të transparencës së qytetit duke e zëvendësuar me një organ tjetër.
Tensionet filluan kur përfaqësues të Partisë Veprimi Kombëtar (PAN) të krahut të djathtë iu afruan kryesisë së parlamentit, duke denoncuar një shkelje të rregullave nga partia e majtë Morena, e cila mban shumicën.
Siç shihet edhe në video, anëtarët e partisë Morena u përpoqën të largonin me forcë deputetët e PAN, të cilët refuzuan të largoheshin nga podiumi. Situata shpejt u përshkallëzua, duke sjellë skena kaosi, ku nuk munguan goditjet me bërryla, shtyrjet, dhe tërheqjet e flokëve.