Alarm në Gjirin e Adenit: Piratë të dyshuar somalezë marrin nën kontroll cisternë pranë brigjeve të Jemenit
Një alarm është ngritur në një nga korridoret detare më të rëndësishme të botës. Persona të armatosur, të cilët dyshohet të jenë piratë somalezë, kanë hipur në një cisternë kimike në Gjirin e Adenit, pranë brigjeve të Jemenit, dhe kanë marrë kontrollin e saj.
Sipas Qendrës Britanike për Operacionet e Tregtisë Detare (UKMTO), anija u sulmua nga persona të paautorizuar ndërsa lundronte në jug të provincës Al-Mukalla, në Jemen. Kompania britanike e sigurisë detare Ambrey vlerëson se pas sulmit qëndrojnë piratë somalezë, duke shtuar se në bord nuk ndodhej ekip sigurie i armatosur.
Mediat ndërkombëtare raportojnë se cisterna, e identifikuar si Asana me flamur të Tanzanisë, po lundronte drejt Bosasos në Somali kur u dha sinjali i emergjencës. Pas marrjes së sinjalit, një anije luftarake e Koresë së Jugut u nis drejt zonës për të ofruar ndihmë.
Ky incident vjen në një periudhë të rritjes së shqetësimeve për sigurinë detare në Gjirin e Adenit dhe Detin e Kuq, ku muajt e fundit janë shënuar disa sulme ndaj anijeve tregtare. Vetëm në fillim të korrikut u raportua një tjetër sulm nga piratë të dyshuar somalezë ndaj një anijeje pranë brigjeve jugore të Jemenit.