Policë të plagosur në Vlorë, u detyruan të qëllojnë me armë për të qetësuar situatën
Një konflikt ka shpërthyer mesditën e sotme në Rrethrrotullimin e Nartës, Vlorë, mes punonjësve të Institutit të Sigurisë Ushqimore dhe Veterinarisë (INUV) dhe tre shtetasve: I. D., 58 vjeç, D. D., 27 vjeç dhe F. D., 23 vjeç.
Policë rrugorë që ndodheshin afër vendit të ngjarjes kanë ndërhyrë për të parandaluar përshkallëzimin e konfliktit. Gjatë përpjekjeve për të qetësuar situatën, edhe punonjësit e policisë janë goditur fizikisht nga tre personat e përfshirë në konflikt.
Në përpjekje për të ndalur sulmin fizik dhe për të neutralizuar agresorët, njëri prej punonjësve të Policisë ka përdorur armën e shërbimit, duke gjuajtur në ajër. Kjo veprimtari nuk ka shkaktuar lëndime.
Si pasojë e goditjeve të marra, dy punonjësit e Policisë janë transportuar në Spitalin Rajonal Vlorë. Mësohet se ata janë jashtë rrezikut për jetën.
Sipas detajeve të dhëna nga Policia, rreth orës 12:20, shërbimet e tyre janë njoftuar për konfliktin në fjalë. Dy punonjës të Qarkullimit Rrugor, që kryenin shërbim të planizuar në afërsi, kanë ndërhyrë dhe janë bërë viktima të sulmit fizik nga tre shtetasit.
Në vendngjarje është ngritur grupi hetimor, i përbërë nga oficerë të Prokurorisë dhe të Inspektoratit të Lartë të Drejtësisë (ILDP), të cilët po vijojnë hetimet për sqarimin e plotë të rrethanave të kësaj ngjarjeje.