Policia përballet me krimin, Ilir Proda dekoron inspektorin që shpëtoi qytetarin nga molotovi
Policia e Shtetit po kalon një periudhë të vështirë, ku zyrtarë të lartë të saj po dalin herë pas here të lidhur me krimin e organizuar. Madje, gjatë disa kontrolleve të fundit në biznese dhe zyrtarë, të cilët lidheshin me dosjen “Balluku”, Byroja Kombëtare e Hetimit dhe SPAK e kishin përjashtuar Policinë e Shtetit nga operacionet.
Megjithatë, kreu i këtij institucioni, Ilir Proda, për të cilin gjithashtu ekziston një numër i madh akuzash për lidhje me krimin, ka gjetur kohë të dekorojë një inspektor policie. Ky i fundit gjatë protestës së opozitës, arriti të shpëtonte një qytetar nga rreziku i djegies me molotov.
Certifikata e dhënë inspektorit Marsel Bizja mban motivacionin: “Në shenjë vlerësimi dhe mirënjohjeje për aktin e humanizmit dhe profesionalizmit të treguar gjatë ushtrimit të detyrës, ku me ndërhyrje të menjëhershme dhe vendimtare shpëtoi jetën e një qytetari, duke vënë në plan të parë mbrojtjen e jetës njerëzore, si një nga vlerat më të larta dhe misioni kryesor i Policisë së Shtetit”.
Certifikata iu dorëzua nga vetë Proda gjatë festës së fundvitit të Drejtorisë Vendore të Policisë Tiranë. “Ju falënderoj për veprimin tuaj, pasi ky veprim dëshmoi edhe një herë humanizmin dhe vendosmërinë e Policisë së Shtetit për të mbrojtur jetën e qytetarëve. Vijoni me përkushtim të përmbushni me nder këtë mision, sa të vështirë, po aq edhe fisnik”, u shpreh Proda.
Sipas artikullit, sikur policia të ishte po kaq e zellshme për të luftuar krimin sa është për të dhënë e marrë dekorata, situata në Shqipëri do të ishte ndryshe. Por, sipas autorit, kjo nuk ndodh.