“`html
Rritja e kostove të transportit në Portin e Durrësit, operatorët paralajmërojnë kthimin e kamionëve bosh.
Operatorët e transportit të mallrave shprehin shqetësimin për radhët e gjata që vijojnë të jenë prezentë në Portin e Durrësit. Kjo situatë, sipas tyre, është rezultat i mosfunksionimit efikas të shërbimit të përpunimit të kontejnerëve. Problemi kryesor, siç theksojnë operatorët, lidhet me numrin e kufizuar të stakerëve (mjete për lëvizjen dhe sistemimin e kontejnerëve), të cilët nuk arrijnë të përballojnë volumin e lartë të punës.
Një nga përfaqësuesit e operatorëve detarë të kontaktuar ka deklaruar se situata ka ardhur si pasojë e mungesës së mjeteve, pra stakerave, të cilët janë thelbësorë për ngarkim-shkarkimin e mallrave në kontejnerë.
Drejtues të tjerë të kompanive të transportit të mallrave kanë pohuar se çdo ditë ka pasur 2 deri në 3 anije në pritje për përpunim. Ata shtojnë se kapacitetet aktuale të mjeteve dhe pajisjeve hasin vështirësi për të përballuar fluksin e ngarkesave. Në shumë raste, sipas tyre, për shkak të intensitetit të përpunimit të mallrave, mjetet transportuese dëmtohen, duke sjellë ndërprerje të shërbimit deri në riparimin e tyre.
Vonesat në operacionet portuale po sjellin kosto shtesë për operatorët. Këto kosto rrjedhin nga pritjet e gjata të anijeve, vonesat në dorëzimin e mallrave dhe rritja e shpenzimeve logjistike.
Rodolf Xhillari, drejtues i kompanisë “Ballkan Trans Albania”, shpjegon se kamionët që dërgohen për marrjen e mallrave nga kontejnerët shpesh kthehen bosh dhe duhet të ngarkohen ditën e nesërme. Ai thekson se kjo situatë i ngarkon më tej operatorët e transportit të mallrave, të cilët duhet të paguajnë tarifa shtesë dhe, në të njëjtën kohë, dëmtohen në marrëdhëniet kontraktuale me klientët porositës për import apo eksport.
Nga ana tjetër, Porti i Durrësit ka reaguar duke sqaruar se situata lidhet me rritjen e ndjeshme të volumit të punës dhe me ndalimin e lëvizjes së mjeteve të tonazhit të rëndë gjatë fundjavave, si pasojë e sezonit turistik.
“Gjatë tre javëve të para të muajit qershor, në Terminalin e Kontejnerëve të Portit të Durrësit janë evaduar rreth 6 mijë kontejnerë, ose mesatarisht rreth 300 kontejnerë në ditë. Fluksi më i lartë i kamionëve që konstatohet në fillim të javës lidhet me përqendrimin e tërheqjes së kontejnerëve pas kufizimeve sezonale të qarkullimit të mjeteve të rënda gjatë fundjavës, dhe jo me ndërprerje apo ngadalësim të operacioneve portuale,” theksohet në reagimin e Autoritetit Portual Durrësit (APD).
Një situatë e ngjashme u përjetua edhe në vitin 2023, ku për rreth një muaj shumë anije mbetën në pritje të shkarkimit të mallrave për disa ditë rresht. Gjatë asaj periudhe, shërbimin në Portin e Durrësit e ofronte kompania koncesionare malteze “Hili Company Limited”, e përfaqësuar në Shqipëri nga “Mariner Adriatic”. Kjo kontratë, e cila ishte dhënë për 5 vite, erdhi pas zgjidhjes së njëanshme të kontratës koncesionare me kompaninë turke “Container Terminal Durrës”. Çështja e arbitrazhit u fitua nga shteti, duke shmangur një faturë dëmi prej 100 milionë euro.
Që prej vitit 2024, shërbimi i përpunimit të kontejnerëve në Portin e Durrësit administrohet drejtpërdrejt nga Autoriteti Portual i Durrësit.
“`