Partia Socialiste (PS) ka caktuar një datë të re për zgjedhjet në Tiranë, ndërsa Taulant Balla i ka dërguar një mesazh strukturave të saj për datën 14 dhjetor.
Socialistët në Tiranë po vazhdojnë përgatitjet për zgjedhjet e pjesshme, pavarësisht se data e 9 nëntorit, e cila ishte dekretuar nga Presidenti Bajram Begaj, tashmë ka rënë.
Data më e afërt për mbajtjen e këtyre zgjedhjeve duket të jetë 14 dhjetori. Portali Lapsi.al ka pasur akses në një mesazh të dërguar nga Taulant Balla në një grup të WhatsApp-it të strukturave të PS-së në Tiranë. Në këtë mesazh, Balla kërkonte mobilizim nga strukturat dhe konfirmoi datën 14 dhjetor për zgjedhjet në Tiranë, edhe pse nuk dihet ende se çfarë do të vendosë Gjykata Kushtetuese për fatin e Erion Veliajt.
Kujtojmë se Gjykata Kushtetuese ka caktuar një seancë për datën 31 tetor për shqyrtimin e ankimimit të Erion Veliajt kundër shkarkimit të tij nga qeveria. Siguria e Taulant Ballës për zhvillimin e zgjedhjeve në Tiranë më 14 dhjetor vihet në pikëpyetje nga vendimi i Gjykatës Kushtetuese. Është e natyrshme që të adresohet pyetja se si Partia Socialiste mund të ketë informacion mbi vendimin e Gjykatës Kushtetuese lidhur me Erion Veliajn.
Taulant Balla është caktuar për të drejtuar fushatën në Njësinë 5 në Tiranë, së bashku me Niko Peleshin.
Dëshira e shprehur nga Edi Rama për të “mbyllur kapitullin” e qeverisjes së tij në Tiranë, duke propozuar Manastirliun në vend të Veliajt, u bë e qartë që nga Asambleja e Partisë Socialiste në shtator. Megjithatë, situata duket se po bëhet më e komplikuar, pasi pritet që SPAK t’i komunikojë edhe Belinda Ballukut se ajo do të jetë person nën hetim për dyshime lidhur me afera korruptive.
Deri më tani, Balluku nuk ka bërë asnjë reagim, ndërsa Edi Rama ka folur për prezumimin e pafajësisë dhe ka shmangur komentet direkte mbi punën e Prokurorisë së Posaçme.