125 të infektuar me HIV/AIDS gjatë vitit 2025, mënyrat kryesore të infektimit në Shqipëri
Gjatë vitit 2025, janë regjistruar 125 raste të reja me HIV/AIDS, duke shënuar një rritje prej 3 rastesh krahasuar me vitin e kaluar. Këto shifra janë përllogaritur deri në muajin tetor të vitit 2025, jo për të gjithë vitin. Ndërkohë, 15 persona kanë humbur jetën si pasojë e HIV-it. Këto janë të dhënat zyrtare të publikuara në Ditën Ndërkombëtare kundër HIV/AIDS.
Nga 125 personat e infektuar në vitin 2025, 98 janë meshkuj dhe 27 janë femra. Që nga viti 1993, kur u diagnostikua rasti i parë me HIV në Shqipëri, numri total i personave të prekur arrin në 1973. Edhe pse meshkujt vazhdojnë të jenë grupi më i prekur, vihet re një rritje edhe në numrin e femrave të infektuara.
Instituti i Shëndetit Publik raporton për një rast të transmetimit të HIV nga nëna te fëmija. Një përfaqësuese e shoqatës së personave me HIV, Olimbi Hoxhaj, ka deklaruar se “Është e patolerueshme të kemi infektime të bebeve nga nëna”.
Mënyrat kryesore të transmetimit të HIV/AIDS në Shqipëri janë:
- Transmetimi seksual: 72.6%
- Meshkujt që kryejnë seks me meshkuj: 23.4%
- Transmetimi nga nëna te fëmija: 2.4% (1 rast në vitin 2025)
- Transmetimi nëpërmjet gjakut: 0.6%
- Përdorimi i drogave me injektim: 0.6%
Me rritjen e sëmundjeve seksualisht të transmetueshme, pritet një rritje edhe e numrit të infektimeve me HIV/AIDS. Për këtë arsye, është e nevojshme më shumë vëmendje nga Instituti i Shëndetit Publik dhe të gjitha strukturat shtetërore.