Kreu i CIA-s takon presidenten e përkohshme të Venezuelës, Delcy Rodríguez
Drejtori i CIA-s, John Ratcliffe, u takua të enjten në Karakas me Delcy Rodríguez, presidenten e përkohshme të Venezuelës. Ky takim përforcon mesazhin e administratës Trump, e cila e konsideron qeverinë e përkohshme si rrugën më të mirë drejt stabilitetit afatshkurtër në vend.
Sipas CNN, gjatë takimit, Ratcliffe diskutoi me Rodríguez fusha të mundshme të bashkëpunimit ekonomik. Njëkohësisht, ai theksoi se Venezuela nuk mund të vazhdojë të shërbejë si strehë për kundërshtarët e Shteteve të Bashkuara, me theks të veçantë te rrjetet e trafikut të drogës.
Siç deklaroi një zyrtar amerikan, ky kontakt kishte për qëllim rritjen e besimit reciprok dhe pasqyron vullnetin e Ratcliffe që CIA të veprojë me më pak hezitim.
Takimi u zhvillua në një periudhë kur Donald Trump duket se po forcon kontrollin e Uashingtonit mbi Venezuelën, veçanërisht në sektorin e prodhimit të naftës. Trump ka deklaruar se Shtetet e Bashkuara do ta “menaxhojnë në thelb” vendin, pas arrestimit të Nicolás Maduro-s më herët gjatë këtij muaji.