Turizmi rrit numrin e bankomateve, por përdorimi kryesor është depozitimi i parave
Turizmi po kontribuon ndjeshëm në rritjen e numrit të bankomateve (ATM) këtë vit. Të dhënat e Bankës së Shqipërisë tregojnë se në mesin e vitit aktual, sektori bankar raportonte 1414 ATM aktivë.
Ky numër ka shënuar një rritje prej 30% që nga fillimi i vitit dhe 16.5% krahasuar me të njëjtën periudhë të vitit të kaluar. Megjithatë, pavarësisht kësaj rritjeje të konsiderueshme të numrit të ATM-ve, tërheqjet e parave në cash nga këto terminale kanë shënuar vetëm një rritje modeste prej 0.6% krahasuar me vitin e kaluar. Gjatë gjashtë muajve të parë, janë kryer pak më shumë se 11 milionë tërheqje cash nga ATM-të.
Edhe vlera e tërheqjeve ka qenë pothuajse e njëjtë me periudhën përkatëse të vitit të kaluar. Kjo rritje e ulët e tërheqjeve duket se konfirmon një tendencë në rritje drejt përdorimit të kartave bankare për blerje direkte në terminalet POS (Point of Sale). Statistikat e Bankës së Shqipërisë tregojnë se në gjysmën e parë të vitit 2026, blerjet me kartë në terminale POS u rritën me 28% krahasuar me të njëjtën periudhë të vitit të kaluar.
Ndryshe nga tërheqjet, përdorimi më i ndjeshëm i ATM-ve është për depozitimin e parave në cash. Sipas statistikave të Bankës së Shqipërisë, për 6-mujorin e parë të këtij viti janë regjistruar gjithsej 1.38 milionë depozitime cash në ATM, duke shënuar një rritje prej 70% krahasuar me të njëjtën periudhë të vitit të kaluar. Vlera totale e depozitimeve për këtë periudhë ka arritur në 68.6 miliardë lekë, me një rritje prej 82% krahasuar me vitin e kaluar.
Shtimi i ATM-ve me funksion depozitimi është një zhvillim i rëndësishëm për lehtësimin e shërbimeve bankare. Automatizimi i këtij shërbimi nëpërmjet ATM-ve po ndikon në lehtësimin e flukseve, pakësimin e radhëve dhe përdorimin e degëve bankare vetëm për raste të domosdoshme ku nevojitet shërbim nga stafi.
Nga ana tjetër, shtimi i ATM-ve po shoqërohet edhe me përditësimin e teknologjisë dhe zgjerimin e gamës së shërbimeve të ofruara, siç janë kryerja e abonimeve apo pagesave për palë të treta.
Në vitet e fundit, shtimi i ATM-ve është nxitur kryesisht nga njësitë e vendosura në zonat turistike të vendit, me qëllim ofrimin e shërbimit të tërheqjes së parave për turistët, veçanërisht ata të huaj. Këto ATM shpesh operohen në partneritet midis bankave dhe bizneseve të tjera, ku banka ofron infrastrukturën e pagesave (sistemin, kontabilitetin dhe paratë cash), ndërsa partnerët ofrojnë pajisjet ATM dhe mbulojnë kostot operacionale (transportin, rimbushjen, sigurimin e parave, marrëdhëniet me bizneset për qiratë). Të ardhurat ndahen më pas bazuar në kontributin e secilës palë.