Sulmi me dron ndaj një pallati, presidenti rumun paralajmëron: Nuk do të lejojmë që lufta e Rusisë t’i transferohet qytetarëve tanë
Rumania reagoi ashpër pas incidentit me dron në juglindje të vendit, ku dy persona mbetën të plagosur pasi një ndërtesë apartamentesh u godit nga një mjet ajror pa pilot.
Presidenti i vendit, Nikușor Dan, deklaroi të premten se autoritetet rumune nuk do të lejojnë që pasojat e luftës së Rusisë kundër Ukrainës të prekin qytetarët e tyre. Ai theksoi se i ka kërkuar Ministrisë së Jashtme të ndërmarrë menjëherë masa lidhur me marrëdhëniet me Rusinë, duke e cilësuar situatën si shumë serioze.
Sipas tij, natyra e paprecedentë e incidentit kërkon një reagim të koordinuar si në nivel kombëtar, ashtu edhe në atë ndërkombëtar.
Ndërkohë, kryeministri në largim Ilie Bolojan njoftoi se Rumania pritet të firmosë brenda orëve të ardhshme një kontratë për blerjen e sistemeve të mbrojtjes kundër dronëve, në kuadër të programit SAFE të Bashkimit Evropian.
Pas incidentit, Ministria e Jashtme rumune thirri për shpjegime ambasadorin e Rusisë në Bukuresht.