Kremlini Provokon Romën: Italia do të “Shembet Plotësisht” nëse Vazhdon Mbështetjen për Ukrainën
Zëdhënësja e Ministrisë së Jashtme ruse, Maria Zakharova, ka lëshuar një deklaratë provokuese kundër Italisë, duke sugjeruar se vendi do të përballet me rrënimin e plotë nëse vazhdon të ofrojë mbështetje financiare dhe ushtarake për Ukrainën.
Italia akuzohet nga Rusia për mbështetjen e përpjekjeve të Kievit për t’u mbrojtur nga pushtimi rus. Zakharova theksoi se Italia ka akorduar 2.5 miliardë euro në ndihma dhe kontribute ushtarake për Ukrainën, duke cituar të dhëna nga Ministria e Jashtme italiane.
“Për sa kohë që qeveria italiane vazhdon të shpërdorojë paratë e taksapaguesve, Italia do të shembet, duke filluar nga ekonomia e saj e deri te simbolet e saj,” shkroi zëdhënësja e Kremlinit.
Kjo nuk është hera e parë që Zakharova shfaqet me tone provokuese. Kohët e fundit, ajo ka pasur deklarata të ngjashme kundër Francës, pas rastit të vjedhjes në muzeun e Luvrit. Gjithashtu, muajt e kaluar, Zakharova sulmoi ashpër presidentin italian Sergio Mattarella, duke i cilësuar komentet e tij gjatë një fjalimi në Universitetin e Marsejës si “shpikje blasfemuese”.
Zakharova ka pretenduar se “Italia ishte vendlindja e fashizmit” dhe se Mattarella është “presidenti i një vendi që historikisht ka qenë në mesin e atyre që sulmuan Rusinë”.
Këto komente vijnë në përgjigje të fjalimit të presidentit Mattarella, i cili u shpreh se “fenomeni autoritar u përhap në disa vende, i nxitur nga ideja se regjimet despotike dhe joliberale ishin më efektive në mbrojtjen e interesave kombëtare. Rezultati ishte një klimë e shtuar konflikti, pavarësisht ndërgjegjësimit për nevojën për të adresuar dhe zgjidhur problemet në një shkallë më të gjerë. Por, në vend të bashkëpunimit, mbizotëroi kriteri i dominimit. Këto ishin luftëra pushtimi. Ky ishte plani i Rajhut të Tretë në Evropë. Agresioni i sotëm rus kundër Ukrainës është i kësaj natyre.”