Dhjetë dronë ukrainas po i drejtoheshin Moskës, Rusia pretendon se i ka rrëzuar
Rusia njoftoi sot se ka rrëzuar 10 dronë që po fluturonin drejt Moskës, sipas një deklarate të Ministrisë së Mbrojtjes së vendit. Ky sulm vjen një ditë pasi ushtria ukrainase goditi një central elektrik pranë kryeqytetit rus.
Të dhënat e ministrisë tregojnë se nga ora 08:00 deri në 20:00 me orën lokale, janë rrëzuar 50 dronë ukrainas në rajonet e Moskës, Bryanskut, Kalugës dhe Kurskut, si dhe në gadishullin e Krimesë dhe në Detin e Zi.
Kryebashkiaku i Moskës, Sergei Sobyanin, ka deklaruar se ekipet e emergjencës janë dërguar në zonat ku kanë rënë pjesë të dronëve.
Goditja ukrainase në centralin elektrik në zonën e Shaturës, rreth 120 kilometra në lindje të Moskës, detyroi autoritetet të aktivizojnë sistemet rezervë për furnizimin me energji të qytetit me 33.000 banorë, ku temperaturat janë shumë të ulëta. Më herët gjatë ditës, guvernatori Andrei Vorobyov njoftoi se funksionimi i centralit në Shaturë është rikthyer në normalitet.