“`html
Sektori bankar shënoi rritje për të dytin vit radhazi në 2025
Sektori bankar ka përshpejtuar ritmin e rritjes për të dytin vit radhazi gjatë vitit 2025. Sipas statistikave të Bankës së Shqipërisë, në fund të muajit nëntor 2025, totali i aktiveve të sektorit bankar arriti vlerën e 2.29 trilionë lekëve, duke shënuar një rritje vjetore prej 9.4%. Ky ritëm rritjeje është më i lartë krahasuar me 7.7% të një viti më parë dhe 1.8% të dy viteve më parë.
Ecuria e përgjithshme e aktiveve në vitet e fundit është ndikuar ndjeshëm edhe nga lëvizjet e kursit të këmbimit. Forcimi i vazhdueshëm i Lekut kundrejt Euros ka pasur një efekt negativ mbi vlerën e aktiveve të mbajtura në valutë, të raportuara në monedhën vendase. Në fund të vitit 2025, kursi i këmbimit Euro-Lek pësoi një rënie të mëtejshme prej 1.4% krahasuar me fundin e vitit 2024. Megjithatë, ritmet e rënies ishin më të ulëta në krahasim me zhvlerësimin prej 5.5% që monedha europiane kishte pësuar një vit më parë. Ecuria më e stabilizuar e kursit, ndër të tjera, ka kontribuar në një rritje më të lartë të aseteve të sektorit bankar gjatë vitit 2025.
Rritja e sektorit bankar është mbështetur kryesisht nga zgjerimi i depozitave të publikut. Në fund të nëntorit, totali i depozitave u rrit me 8.9% krahasuar me një vit më parë. Vitin paraprak, rritja e depozitave kishte qenë 5%. Shtesa e depozitave është përkthyer, në krahun tjetër të bilancit, në një zgjerim të shpejtë të grupeve kryesore të aseteve, siç janë kreditë për sektorin privat dhe investimet në letra me vlerë.
Portofoli i kredisë (duke përfshirë edhe kreditë për jorezidentët) arriti vlerën e 986 miliardë lekëve, duke shënuar një rritje vjetore prej 14.8%. Kreditimi po rritet me ritmet më të larta në 16 vitet e fundit, sidomos falë kreditimit për individët. Pavarësisht masave frenuese të Bankës së Shqipërisë, kreditimi po ecën me një ritëm lehtësisht më të ngadaltë krahasuar me vitin 2024.
Paralelisht, bankat kanë zgjeruar edhe portofolin e letrave me vlerë, i cili arriti në 900.5 miliardë lekë, me një rritje prej 7.2% krahasuar me një vit më parë. Bankat kanë rritur njëkohësisht investimin si në letra me vlerë të qeverisë shqiptare, ashtu edhe në titujt e emetuesve të huaj. Rritja e vazhdueshme e depozitave në valutë ka sjellë rritje edhe të investimeve në letra me vlerë jashtë vendit në vitet e fundit.
Zgjerimi i aktiveve, rritja e normave të interesit dhe përmirësimi i mëtejshëm i cilësisë së portofolit të kredisë kanë ndikuar pozitivisht edhe performancën financiare të sektorit. Sipas të dhënave të mbështetura në standardet mbikëqyrëse të raportimit, fitimi neto në fund të 11-mujorit 2025 arriti në 32.1 miliardë lekë. Megjithatë, fitimi i sektorit ka pësuar një rënie prej 4.5% krahasuar me të njëjtën periudhë të vitit 2024, kryesisht për shkak të uljes së normave të interesit për Leks dhe Euron. Edhe kthimi nga kapitali ka shënuar rënie, duke u ulur në nivelin 15.77%, nga 17.96% që kishte qenë në të njëjtën periudhë të vitit paraprak.
“`