Protestat e dhunshme në Iran dhe mundësia për një sulm amerikan
Sipas një raporti të “NBC News”, presidenti Donald Trump synon një ndërhyrje vendimtare në Iran, dhe lëvizjet aktuale tregojnë se goditjet ushtarake janë afër.
Donald Trump është shprehur pro ndërhyrjes në Iran pas përshkallëzimit të protestave, të cilat raportohet të kenë shkaktuar më shumë se 2 mijë viktima. Presidenti amerikan ka bërë deklarata të shpeshta duke shprehur mbështetje për protestuesit dhe duke paralajmëruar regjimin iranian për dhunën e përdorur ndaj tyre.
Sipas “NBC News”, Trump i ka komunikuar ekipit të tij të sigurisë kombëtare dëshirën që çdo veprim ushtarak amerikan në Iran të ketë si qëllim një goditje të shpejtë dhe vendimtare ndaj regjimit, duke shmangur një luftë të zgjatur.
“Nëse ai ndërmerr një veprim, ai dëshiron që ai të jetë përfundimtar,” ka deklaruar një burim i cituar nga NBC.
Pentagoni thuhet se ka urdhëruar aeroplanmbajtësen USS Abraham Lincoln dhe shkatërruesit që e shoqëronin (USS Spruance, USS Michael Murphy dhe USS Frank E. Petersen) të largohen nga Deti i Kinës Jugore dhe të drejtohen drejt Lindjes së Mesme.
Megjithatë, këshilltarët e Trump deri më tani nuk kanë arritur të sigurojnë se regjimi në Teheran do të shembet shpejt pas një sulmi ushtarak amerikan, sipas një zyrtari amerikan.
Në të njëjtën kohë, ekziston shqetësimi se Shtetet e Bashkuara mund të mos disponojnë të gjitha mjetet e nevojshme në rajon për t’u mbrojtur nga një përgjigje agresive iraniane, siç e parashikojnë zyrtarët e administratës.
Zyrtarët amerikanë druajnë se një regjim iranian, i dobësuar nga javë protestash mbarëkombëtare dhe përballë një rreziku të mundshëm rrënimi, mund të bëhet edhe më i rrezikshëm duke u hakmarrë kundër forcave amerikane në rajon dhe aleatëve të tyre, siç është Izraeli.
Kjo dinamikë mund ta shtyjë Trumpin të autorizojë një sulm ushtarak më të kufizuar amerikan ndaj Iranit, të paktën fillimisht, duke ruajtur gjithashtu opsionet për përshkallëzim nëse vendos të ndërmarrë ndonjë veprim ushtarak, sipas burimeve.
Të mërkurën në mbrëmje, Trump deklaroi për gazetarët se regjimi iranian kishte ndaluar vrasjen e protestuesve dhe kishte pezulluar planet për ekzekutime, të cilat ai tha se mund të provokonin një përgjigje ushtarake nga Shtetet e Bashkuara.
“Ne jemi informuar nga burime shumë të larta nga pala tjetër dhe ata na kanë thënë se vrasjet kanë ndaluar dhe ekzekutimet nuk do të ndodhin. Shpresoj se kjo është e vërtetë,” tha Trump.