SHBA synon sjelljen e “Dark Eagle” në front/ Analiza: Pse raketa hipersonike nuk mund ta ndryshojë rrjedhën e ngjarjeve në Iran
Shtetet e Bashkuara të Amerikës po shqyrtojnë për herë të parë mundësinë e përdorimit të një rakete hipersonike në një konflikt të mundshëm me Iranin, një lëvizje që shihet si sinjal i një përshkallëzimi të ri në Lindjen e Mesme.
Sipas burimeve ushtarake, Forcat e Armatosura amerikane po analizojnë vendosjen e sistemit hipersonik tokë-tokë “Dark Eagle”. Ky sistem është projektuar për të ofruar shpejtësi shumë të lartë, precizion të avancuar dhe aftësi për të goditur objektiva në distanca të mëdha, duke depërtuar mbrojtjet më të sofistikuara ajrore.
Komanda Qendrore e SHBA ka theksuar se “Dark Eagle” mund të jetë veçanërisht efektiv për goditjen e objektivave strategjikë, si lëshuesit e raketave iraniane që ndodhen jashtë rrezes së sistemeve ekzistuese si Precision Strike Missile, i cili përdoret nga sistemet HIMARS.
Megjithatë, vendimi për të marrë në konsideratë këtë armë vjen në një moment kur rezervat raketore amerikane janë dobësuar ndjeshëm nga konfliktet e fundit. Sisteme si THAAD dhe Patriot, si dhe raketat Tomahawk dhe JASSM, janë përdorur me ritme të larta, duke krijuar boshllëqe që mund të kërkojnë vite për t’u plotësuar.
Ekspertët mbeten skeptikë për efektivitetin e “Dark Eagle”. Edhe pse sistemi ka kaluar disa teste të suksesshme në vitin 2024, ai vazhdon të konsiderohet eksperimental dhe është i disponueshëm në numër shumë të kufizuar. Sipas vlerësimeve të Pentagonit, të dhëna të plota për performancën e tij në kushte reale nuk priten para vitit 2027.
Analistja Jennifer Kavanagh vuri në dukje se kostoja e një rakete arrin rreth 41 milionë dollarë, duke ngritur pikëpyetje mbi justifikimin ekonomik dhe strategjik të përdorimit të saj kundër Iranit.
Sipas ekspertëve, fakti që Irani nuk disponon sisteme shumë të avancuara të mbrojtjes ajrore që kërkojnë teknologji hipersonike për t’u depërtuar, e bën edhe më të diskutueshme përdorimin e këtij sistemi. Për më tepër, numri i kufizuar i raketave dhe kostoja e lartë pritet të kufizojnë ndikimin real në terren.
Megjithatë, analistët sugjerojnë se diskutimi për vendosjen e “Dark Eagle” mund të ketë edhe një dimension psikologjik dhe strategjik, duke synuar rritjen e presionit ndaj Teheranit dhe forcimin e moralit të aleatëve amerikanë në rajon. Ky zhvillim kujton edhe vendosjen e avionëve luftarakë F-22 Raptor në Izrael para nisjes së operacioneve ushtarake, një lëvizje që u interpretua si demonstrim force dhe mesazh paralajmërues ndaj Iranit.