Qeveria miraton shpërblimin e fundvitit për pensionistët
Këshilli i Ministrave ka miratuar sot dhënien e një shpërblimi financiar për pensionistët dhe kategoritë e veçanta të përfituesve me rastin e festave të fundvitit 2025. Ky vendim synon të mbështesë financiarisht shtresat më të cenueshme gjatë periudhës festive.
Sipas vendimit, pensionistët dhe përfituesit e tjerë do të ndahen në dy kategori përsa i përket shumës së shpërblimit:
- Pensionistët me pension deri në 20,000 lekë, si dhe disa kategori të tjera të përfituesve, do të marrin një shpërblim prej 15,000 lekësh. Kjo kategori përfshin:
- Personat që përfitojnë pension pleqërie, invaliditeti, familjar dhe social deri në 20,000 lekë.
- Fëmijët në përkujdesje të Republikës.
- Veteranët e Luftës Antifashiste Nacionalçlirimtare.
- Personat që marrin vetëm pension të posaçëm për merita të veçanta.
- Personat që përfitojnë pension të parakohshëm për vjetërsi shërbimi deri në 20,000 lekë dhe nuk janë të punësuar.
- Personat që përfitojnë pension ose trajtim të veçantë financiar lidhur me punën në miniera, industri ushtarake apo metalurgji, deri në 20,000 lekë.
- Pensionistët me pension mbi 20,000 lekë dhe përfituesit e trajtimeve të veçanta do të përfitojnë 10,000 lekë. Kjo kategori përfshin pensionet e pleqërisë, trajtimet e veçanta financiare, pensionet suplementare për funksione kushtetuese dhe pensionet e vështirësisë së profesionit me masë mbi 20,000 lekë.
Kryeministri ka sqaruar se diferencimi në shumën e shpërblimit bëhet me qëllim që të favorizohen më shumë ata me pensione më të ulëta.
Të gjithë përfituesit, pavarësisht kategorisë, do të marrin shpërblimin, duke përfshirë edhe ata që fillojnë të përfitojnë deri më 31 dhjetor 2025.
Fondi total i parashikuar për këtë shpërblim arrin në 10.4 miliardë lekë. Pagesat do të kryhen në llogaritë e pensionistëve gjatë muajit dhjetor 2025 dhe do të jenë të realizueshme deri më 30 qershor 2026. Shpërblimet e patërhequra pas kësaj date do të parashkruhen.
Më herët, kryeministri kishte bërë me dije se pas bonusit të fundvitit, pensionistët do të shpërblehen edhe me një bonus pranvere, në vlerën e 100-150 eurove, në varësi të masës së pensionit.