“`html
Shqipëria mes vendeve me numrin më të lartë të të burgosurve në Europë, por me përqindjen më të ulët të grave të burgosura.
Shqipëria renditet mes 10 vendeve europiane me numrin më të lartë të të burgosurve në raport me popullsinë, sipas të dhënave më të fundit të publikuara nga Eurostat.
Të dhënat për Shqipërinë, të disponueshme për vitin 2023, tregojnë se vendi kishte 182 të burgosur për çdo 100 mijë banorë. Ky numër është dukshëm më i lartë se mesatarja e Bashkimit Europian, e cila ishte 113 për 100 mijë banorë në vitin 2024 dhe 111 në vitin 2023.
Në nivel europian, Turqia mban rekordin, me 342 të burgosur për 100 mijë banorë në vitin 2024, megjithëse ky tregues shënoi një rënie nga 449 që ishte një vit më parë.
Në rajon, Mali i Zi raportoi 170 të burgosur për 100 mijë banorë në vitin 2023, ndërsa në vitin 2024 ky shifër u rrit në 191, duke kryesuar rajonin së bashku me Shqipërinë. Serbia gjithashtu ka një nivel të lartë, me 173-176 të burgosur për 100 mijë banorë, ndërsa Maqedonia e Veriut ka shifrën më të ulët në rajon, me 133-134.
Europa dhe të burgosurit:
- Sipas Eurostat, në vitin 2024, në BE ishte 1 i burgosur për çdo 883 banorë, ose 113 për 100 mijë banorë, një rritje e lehtë krahasuar me vitin 2023 (111).
- Normat më të larta të të burgosurve në BE u regjistruan në Hungari (193), Poloni (191), Letoni (187) dhe Çeki (178).
- Normat më të ulëta u raportuan në Finlandë (57), Holandë (67), Danimarkë dhe Gjermani (secila me 70).
- Në vitin 2024, numri total i të burgosurve në BE ishte rreth 509 mijë, duke shënuar një rënie prej 8.0% krahasuar me vitin 2012 (rreth 553 mijë).
- Pas një periudhe stabiliteti (2017-2019), numri i të burgosurve ra me 6.6% në vitin 2020, ndoshta për shkak të masave anti-COVID-19.
- Më pas, nga viti 2021 deri në 2024, numri i të burgosurve u rrit me gjithsej 9.8%.
Shqipëria me nivelin më të ulët të grave të burgosura në Europë:
Në Shqipëri, shumica e të burgosurve janë meshkuj, ndërsa përqindja e grave të burgosura është më e ulëta në Europë, vetëm 1.4%. Mesatarja në Bashkimin Europian është 5.5%.
Në rajon, Serbia kryeson për numrin e grave të burgosura, ku gati 5% e të burgosurve janë gra.
Sipas Eurostat, në vitin 2024, në BE 1 në 18 të burgosur të rritur ishte grua, ose 5.5% e popullsisë totale në burgje, pothuajse e njëjtë me vitin 2023 (5.4%).
Pesha e grave në burgje ndryshon ndërmjet vendeve të BE-së:
- Përqindjet më të larta u regjistruan në Hungari (8.7%), Çeki (8.6%), Maltë (8.4%) dhe Suedi (7.9%).
- Përqindjet më të ulëta u raportuan në Francë (3.4%), Belgjikë (4.1%) dhe Bullgari (4.3%).
“`