Shqiptari në Romë: 200 kg kokainë dhe armë në shtëpi

Një 23-vjeçar me origjinë shqiptare u arrestua në Romë pasi në shtëpinë ku banonte u gjetën 200 kilogramë kokainë. Kjo sasi droge, e ndarë në 191 pako me simbole të ndryshme, pritet të sillte rreth 16 milionë euro në tregun ilegal. Përveç kokainës, në banesë u gjetën gjithashtu një pistoletë, municione dhe rreth 30,000 euro.

Apartamenti shërbeu si bazë për ruajtjen dhe shpërndarjen e substancave narkotike. Arrestimi ndodhi pasi oficerët e policisë patën dyshime për sjelljen e të riut gjatë një kontrolli të zakonshëm. Në çantën e tij të shpinës u gjet një shumë e konsiderueshme parash, të cilat nuk mund t’i justifikonte, duke pasur parasysh se rezultoi i papunë.

Droga, e cila kishte shenja dalluese për identifikim të llojit, kishte për qëllim furnizimin e tregut të Romës dhe financimin e veprimtarive kriminale. Arma e gjetur rezultoi të ishte e vjedhur.

Për të shmangur zbulimin gjatë transportimit dhe shitjes, i riu, i cili aktualisht ndodhet në burgun e Rebibbias, përdorte një automjet të modifikuar me një ndarje të fshehtë në bagazh, që hapej me kod.