Skandali i Prostitucionit Të Shqetëson Futbollin Italian, Dalin Emrat e Yjeve të Serie A – “Paketa VIP” me Çmime të Larta
Një skandal i rëndë ka shpërthyer në Itali, duke përfshirë drejtpërdrejt botën e futbollit. Zbulimi i një rrjeti të organizuar prostitucioni, i cili operonte përmes eventesh luksoze dhe shërbimeve ekskluzive për klientë VIP, ka tronditur opinionin publik.
Sipas dosjes hetimore të Prokurorisë së Milanos, rrjeti vepronte i maskuar si agjenci eventesh. Ai organizonte festa elitare dhe, për klientët e përzgjedhur, ofronte edhe shërbime seksuale. Operacioni u krye nga Guardia di Finanza, dhe deri më tani janë arrestuar disa persona të dyshuar për “favorizim të prostitucionit” dhe pastrim parash.
Në përgjimet dhe dokumentet e hetimit përmenden emra të njohur të futbollit italian, mes tyre Raoul Bellanova, Nicolò Zaniolo, Samuele Ricci dhe Alessandro Buongiorno. Sipas raportimeve, këta futbollistë përmenden si klientë të mundshëm të rrjetit, por nuk janë aktualisht nën hetim penal. Kjo pasi ligji italian nuk e konsideron të paligjshme pagesën për shërbime të tilla, por ndëshkon organizimin dhe shfrytëzimin e prostitucionit.
Sipas raportimit të “Gazzetta Dello Sport”: “Vajza shumë të reja do t’u jepeshin zarfe me para në dorë, në varësi të shërbimeve të kryera dhe të ardhurave të realizuara. Shuma ndryshonte nëse qëndronin ose jo në dhomën në hotel kundrejt 70-100 euro për mbrëmje, nga tavolinat dhe nga shërbimi i ofruar. Ato do të pranonin të merrnin shumë më pak, krahasuar me paratë që përfitonte organizata. Çifti Buttini-Ronchi do të mbante për vete më shumë se 50 për qind të shumës së paguar nga futbollisti apo sportisti i radhës. Denoncuesja kishte përmendur, për shembull, rastin e një vajze kolumbiane që në vitin 2022 ishte detyruar të prostituohej me një futbollist në këmbim të 1000 eurove, nga të cilat më pak se gjysma i shkonin asaj,” thekson “Gazzetta Dello Sport”.
“Paketa All-Inclusive” dhe Shërbime Luksi
Hetimet kanë zbuluar se rrjeti ofronte të ashtuquajturat “paketa all-inclusive”, të cilat përfshinin:
- Darka në restorante luksoze.
- Qëndrime në hotele elitare.
- Shoqërimin e vajzave për një natë.
Çmimet ishin shumë të larta dhe ndryshonin në varësi të kërkesave të klientëve dhe “shërbimeve shtesë”. Eventet organizoheshin kryesisht në Milano, por edhe në destinacione të njohura si Mykonos, ku zhvilloheshin festa private për klientë të pasur dhe VIP-a.
Përgjimet Zbulojnë Kërkesa të Drejtpërdrejta
Dosja hetimore përfshin edhe biseda të përgjuara që hedhin dritë mbi mënyrën e funksionimit të rrjetit. Në një prej tyre dëgjohet një kërkesë e drejtpërdrejtë: “Kam një mik që është pilot i Formula 1 dhe do një të dashur me pagesë. A mund t’ia gjejmë?”. Ndërsa përgjigjja ishte: “Do t’ia dërgoj brazilianen”. Këto komunikime, sipas hetuesve, tregojnë qartë strukturën dhe mënyrën e organizimit të shërbimeve.
Gjatë operacionit janë sekuestruar mbi 1.2 milionë euro, që dyshohet se janë përfituar nga aktiviteti i paligjshëm i rrjetit. Autoritetet italiane besojnë se organizata ka operuar për vite me radhë, duke rekrutuar gra dhe duke i përdorur në këtë skemë për klientë të pasur, përfshirë figura nga sporti dhe bota e spektaklit.