Suedia do të përgjysmojë çmimet e biletave mujore të transportit publik përpara zgjedhjeve
Qeveria e krahut të djathtë të Suedisë njoftoi të martën se ka miratuar një plan për të përgjysmuar çmimin e biletave mujore të transportit publik në gjysmën e dytë të vitit 2026. Ky veprim synon të lehtësojë barrën financiare të familjeve, duke ardhur përpara zgjedhjeve parlamentare të shtatorit.
Ulja e përkohshme e çmimeve, e cila do të hyjë në fuqi nga 1 korriku, pritet të kushtojë rreth 6.5 miliardë korona (699 milionë dollarë). Këtë e bëri të ditur ministrja e arsimit dhe udhëheqësja e Partisë Liberale, Simona Mohamsson.
Masat e mëparshme të qeverisë, të cilat kishin për qëllim zbutjen e pasojave të luftës në Lindjen e Mesme, përfshinin uljen e përkohshme të taksave për karburantin, kompensime për familjet për faturat e energjisë elektrike dhe mbështetje për kompanitë ajrore.
“Po përballemi me krizën më të rëndë energjetike që bota ka parë ndonjëherë”, theksoi ministrja e Energjisë, Ebba Busch, gjatë një konference për shtyp të mbajtur të martën.
Qeveria e pakicës, e cila bashkëpunon ngushtë me partinë anti-emigracion Demokratët e Suedisë, ka ndërmarrë gjithashtu veprime të tjera për të mbështetur ekonominë familjare. Që nga prilli, është ulur përkohësisht Tatimi mbi Vlerën e Shtuar (TVSH) për produktet ushqimore.