Lufta nuk ndalet: Sulm me dron në Liban lë një të vrarë dhe dy të plagosur
Një sulm me dron në Liban ka rezultuar në një viktimë dhe ka lënë dy persona të plagosur, sipas raportimeve të mediave shtetërore.
Agjencia Kombëtare e Lajmeve në Liban raporton se Izraeli dyshohet të jetë përgjegjës për këtë sulm. Ngjarja ka ndodhur në orët e para të mëngjesit, në periferi të Jabbour, në zonën e Bekës Perëndimore.
Ky incident vjen në një moment delikat, pasi Izraeli dhe Hezbollahu janë nën një armëpushim të përkohshëm, të vendosur pas tensioneve të fundit mes dy palëve. Megjithatë, situata në terren mbetet e paqëndrueshme.
Mediat ndërkombëtare, duke përfshirë Associated Press, raportojnë se gjatë ditës së djeshme dhe natës janë regjistruar përplasje dhe shkëmbime zjarri, duke theksuar se armëpushimi është i brishtë.
Ndërkohë, Izraeli vazhdon të mbajë nën kontroll disa zona në jug të Libanit, duke argumentuar se prania e tij ka si qëllim krijimin e një zone sigurie përgjatë kufirit.