SHBA: Arrestohet person për sulm ndaj shtëpisë së zëvendëspresidentit JD Vance në Ohio
Një person është arrestuar pas një sulmi gjatë natës në shtëpinë e JD Vance, ku u thyen dritaret. Autoritetet në Ohio njoftuan të hënën se zëvendëspresidenti amerikan nuk ndodhej në rezidencën e tij në Cincinnati në momentin e ngjarjes, sipas një deklarate të Shërbimit Sekret Amerikan.
Agjencia bëri të ditur se një mashkull i rritur u arrestua pak pas mesnatës për “shkaktimin e dëmtimit të pronës, duke përfshirë thyerjen e dritareve në pjesën e jashtme të një rezidence private të lidhur me zëvendëspresidentin”, raportoi CNN.
Zëdhënësi Anthony Guglielmi deklaroi se “Shërbimi Sekret Amerikan po koordinohet me Departamentin e Policisë së Cincinnati dhe Zyrën e Prokurorit të SHBA-së, ndërsa vendimet për akuzat po rishikohen.”
Televizioni i lajmeve nga Cincinnati, WLWT, raportoi se agjentët e Shërbimit Sekret dhe policia e Cincinnati kaluan disa orë në shtëpinë e vendosur në lagjen East Walnut Hills, pasi iu përgjigjën njoftimeve për dëmtimin e dritareve.