Dronë dhe raketa: Sulmet mes Rusisë dhe Ukrainës vazhdojnë. Moska në shënjestër, 2 të vdekur.
Të paktën dy persona kanë humbur jetën dhe gjashtë të tjerë janë plagosur si pasojë e një sulmi masiv me dronë ukrainas gjatë natës në rajonin e Moskës, sipas autoriteteve ruse.
Guvernatori i rajonit të Moskës, Andrei Vorobyov, njoftoi se mbrojtja ajrore ruse ka rrëzuar 249 dronë, ndërsa sulmet kanë shkaktuar zjarre në disa banesa dhe në një magazinë.
Në Sofjino, një grua 44-vjeçare vdiq pasi një dron goditi një ndërtesë banimi trekatëshe. Pesë persona të tjerë, mes tyre dy fëmijë, u plagosën.
Një viktimë tjetër u raportua në distriktin Orekhovo-Zuevo, ku një burrë i moshuar humbi jetën pasi një dron goditi shtëpinë e tij private.
Në Moskë, kryebashkiaku Sergei Sobyanin deklaroi se një dron goditi një ndërtesë pranë një prej bulevardeve të kryeqytetit, ndërsa një objekt në një rafineri nafte u dëmtua.
Sipas Sobyaninit, rreth 450 dronë që po drejtoheshin drejt Moskës u rrëzuan, në atë që ai e cilësoi si një sulm të paprecedentë.
Autoritetet ruse raportuan gjithashtu kufizime të përkohshme në trafikun ajror. Në aeroportin Sheremetyevo, më i madhi i Moskës, pasagjerët u njoftuan për kufizime të përkohshme, ndërsa në aeroportin Vnukovo u pezulluan të gjitha nisjet dhe mbërritjet.
Në rrjetet sociale janë publikuar pamje që pretendojnë të tregojnë shpërthime në qiell gjatë natës në rajonin e Moskës, si dhe një magazinë në flakë, por autenticiteti i këtyre videove nuk është verifikuar.
Ndërkohë, Ukraina ka raportuar viktima nga sulmet ruse.
Në qytetin Fastiv, në rajonin e Kievit, një nënë dhe dy fëmijët e saj të vegjël, një djalë dhe një vajzë, u vranë nga një sulm rus gjatë së shtunës, sipas drejtuesit të rajonit të Kievit, Tymur Tkachenko. Nga sulmi u dëmtuan edhe disa banesa private.
Në rajonin verilindor të Sumit, katër persona humbën jetën pasi një dron rus goditi automjetin me të cilin po udhëtonin, bëri të ditur zyrtari i lartë lokal Oleh Hryhorov.
Rusia dhe Ukraina kanë intensifikuar së fundmi sulmet me dronë dhe raketa, duke goditur objektiva të lidhura me prodhimin e energjisë, transportin dhe infrastrukturën logjistike. Lufta mes dy vendeve vijon që nga pushtimi i plotë i Ukrainës nga Rusia në shkurt të vitit 2022.